ەرلەر اراسىنداعى بەدەۋلىك: بارىنە تەلەفون كىنالى مە

زەرتتەۋ ۇيالى تەلەفوندى ءجيى پايدالانۋ ەر ادامنىڭ سپەرماتوزويد سانىنا اسەر ەتۋى مۇمكىن ەكەنىن كورسەتتى. كەيىنگى 50 جىلدا الەم بويىنشا ەر ادامدارداعى اتالىق جىنىس جاسۋشا سانى %50 اسا ازايعان. زەرتتەۋشىلەر ونىڭ سەبەبىن انىقتاۋعا تىرىسىپ جاتىر. Kazinform بۇل تۋرالى CNN-گە سىلتەمە جاساپ حابارلايدى.

قورشاعان ورتانىڭ لاستانۋى، پەرفتورالكيلدىك جانە پوليفتورالكيلدىك حيميالىق زاتتار (پ ف ح ز)، تاماعىمىزداعى، سۋداعى باسقا دا زياندى قوسپالار، سەمىزدىك پەن سوزىلمالى اۋرۋلاردىڭ كوبەيۋى، ءتىپتى ۇنەمى جانىمىزدا جۇرەتىن ۇيالى تەلەفون سپەرماتوزويد سانىنىڭ ازايۋىنا سەبەپ بولا ما؟

جاڭا زەرتتەۋ ۇيالى تەلەفونداردىڭ ءرولىن تالداپ، تەلەفوندى كۇنىنە 20 رەتتەن ارتىق پايدالاناتىن 18-22 جاس ارالىعىنداعى ەر ادامداردىڭ اتالىق جىنىس جاسۋشاسىنىڭ سانى ازايۋ قاۋپى %21 جوعارى ەكەنىن انىقتادى.

سونداي-اق ولاردا سپەرماتازويدتىڭ شوعىرلانۋىنىڭ تومەندەۋ قاۋپى %30 جوعارى بولىپ شىقتى.

ءبىر قۋانتارلىق جاعداي، 13 جىل بويعى زەرتتەۋ تەلەفون تەحنولوگيالارى جەتىلگەن سايىن گادجەتتەردىڭ ەر ادام سپەرماتوزويدىنا اسەرى تومەندەگەنىن كورسەتتى.

سونىمەن قاتار اتالىق جىنىس جاسۋشانىڭ فيزيولوگيالىق ۇلگىسى مەن قوزعالىسى ناشارلاماعان.

«بۇل - ادەتتەردى تۇبەگەيلى وزگەرتپەۋى نەمەسە ۇرەي تۋدىرماۋى قاجەت قىزىق جانە جاڭا زەرتتەۋ. بالالى بولعىسى كەلەتىن نەمەسە جىنىس جاسۋشاسىنىڭ ساپاسىن جاقسارتقىسى كەلەتىن ار ادامدار سپورتپەن اينالىسىپ (ءبىراق شاپ ماڭىن قىزدىرماي)، دۇرىس تاماقتانىپ، ارتىق سالماق پەن تەمەكى شەگۋدەن الشاق بولىپ، الكوگولدى شەكتەۋى قاجەت. سونداي-اق ەگەر بالا كوتەرۋ ماسەلەسى تۋىنداسا كومەككە جۇگىنۋى كەرەك»، - دەيدى بەدەۋلىكتى ەمدەيتىن Care Fertility ەمحانالار جەلىسىنىڭ عىلىمي قىزمەتكەرى ەليسون كەمپبەلل.

ۇيالى تەلەفون ءومىرىمىزدىڭ اجىراماس بولىگىنە اينالدى. دەگەنمەن قالتافوندار راديوجيىلىكتى ەلەكتروماگنيت تولقىندار نەمەسە RF- EMF بولەدى.

ەگەر ۇيالى تەلەفون ماكسيمال قۋاتىن بولسە اينالاداعى جاسۋشا 0,5 سەلسي گرادۋسقا نەمەسە فارەنگەيت بويىنشا شامامەن 33 گرادۋسقا قىزادى، دەلىنگەن زەرتتەۋدە.

كاليفورنيا قوعامدىق دەنساۋلىق ساقتاۋ دەپارتامەنتىنىڭ دەرەگى بويىنشا، راديوجيىلىكتى ەلەكتروماگنيت تولقىندار ءماتىن تۇرىندەگى حابارلامانى جىبەرگەندە ايتارلىقتاي ازايىپ، ۇلكەن فايلداردى، بىرنەشە اۋديو نەمەسە ۆيدەو جازبانى جىبەرگەندە، ءبىر نەمەسە ەكى عانا جولاق شىعىپ تۇرعاندا، سونداي-اق جىلدام قوزعالىپ بارا جاتقان اۆتوبۋس، اۆتوكولىك نەمەسە پويىزدا ەڭ جوعارى كورسەتكىشكە جەتەدى.

دەپارتامەنت تەلەفوندى پايدالانعاندا دەنە مەن باستان الىسىراق ۇستاپ، ونىڭ ورنىنا داۋىس ۇلعايتقىش نەمەسە قۇلاققاپ قولدانىپ، تەلەفوندى سومكەگە سالىپ جۇرۋگە كەڭەس بەرەدى.

ەر ادامداردىڭ %85 تەن استامى تەلەفوندى شالبارىنىڭ قالتاسىنا سالىپ جۇرەدى.

زەرتتەۋ تەلەفونىن كۇنىنە ءبىر رەتتەن بەس رەتكە دەيىن قولدانعان نەمەسە اپتاسىنا ءبىر رەتتەن دە از پايدالانعان جىگىتتەردىڭ سپەرماتوزويد سانى مەن ولاردىڭ شوعىرلانۋى جوعارى بولعانىن كورسەتتى.

ۇيالى تەلەفونداردى پايدالانۋ جيىلىگى ارتقان سايىن جىنىس جاسۋشا سانى دا تومەندەي بەرگەن.

ەڭ تومەنگى كورسەتكىش تەلەفوندى كۇنىنە 20 رەتتەن كوپ پايدالاتىن ەركەكتەردە تىركەلدى.

سولت- لەيك-سيتيدەگى يۋتا ۋنيۆەرسيتەتى مەديتسينا مەكتەبىنىڭ حيرۋرگيا جانە ۋرولوگيا كافەدراسىنىڭ دوتسەنتى الەكساندر پاستۋشاك كۇن سايىن بالالى بولۋعا تىرىسىپ جۇرگەن جۇپتارمەن جۇمىس ىستەيتىن ساراپشى رەتىندە بەدەۋلىككە اسەر ەتەتىن فاكتورلار ءار الۋان ەكەنىن، سپەرماتوزويدتار ەكىنشى ساناتتاعى رولدە ەكەنىن ايتادى.

ول جاسۋشانىڭ ساپاسى ماڭىزدى دەيدى.

«ەگەر ءسىزدىڭ جاسۋشاڭىز ساپالى بولسا، جاسۋشا كولەمى از بولسا دا بالالى بولۋ مۇمكىندىگىڭىز جاقسى، ءتىپتى جوعارى» دەپ اتاپ ءوتتى ول.

اۆتور

ەركەجان سماعۇلوۆا