ەرلان تۇرعىمبايەۆ ەكى ايعا قامالدى
استانا. KAZINFORM - باس پروكۋراتۋرا بۇرىنعى ىشكى ىستەر ءمينيسترى ەرلان تۇرعىمبايەۆتىڭ ەكى ايعا قامالعانىن راستادى.
ۆەدومستۆونىڭ مالىمەتىنشە، استانا قالاسىنىڭ مامانداندىرىلعان تەرگەۋ سوتى 30-ساۋىردە بۇرىنعى مينيستر ەرلان تۇرعىمبايەۆقا قاتىستى ەكى اي مەرزىمگە «كۇزەتپەن ۇستاۋ» تۇرىندەگى بۇلتارتپاۋ شاراسىن سانكسيالاعان.
«ق ر ق پ ك 201-بابىنا سايكەس وزگە مالىمەتتەر جاريالاۋعا جاتپايدى» دەيدى باس پروكۋراتۋرادان.
ەسكە سالا كەتەيىك، ەكس-مينيستر ءساۋىردىڭ سوڭىندا 2022-جىلعى قاڭتار وقيعاسى كەزىندە قىزمەتتىك وكىلەتتىگىن اسىرا پايدالاندى دەگەن باپ نەگىزىندە قوزعالعان ءىس بويىنشا ۇستالدى.
ايتا كەتەيىك، ەرلان تۇرعىمبايەۆ ق ر ىشكى ىستەر مينيسترلىگىن 2019-جىلدان باستاپ باسقاردى.
ول لاۋازىمىنان قاڭتار وقيعاسىنان سوڭ 2022-جىلى بوساتىلعان بولاتىن.
بۇدان سوڭ ول جارتى جىلداي پرەزيدەنتتىڭ كەڭەسشىسى، ال 2023-جىلى ش ى ۇ وڭىرلىك تەرروريزمگە قارسى قۇرىلىمىنىڭ كەڭەسشىسى قىزمەتىنە تاعايىندالدى.
