ەرلان قوشانوۆ تۇركپا جۇمىسىنىڭ باسىم باعىتتارىن اتادى

استانا. KAZINFORM - تۇركى مەملەكەتتەردىڭ پارلامەنتتىك اسسامبلەياسىنىڭ پلەنارلىق وتىرىسىندا پارلامەنت ءماجىلىسىنىڭ ءتوراعاسى ەرلان قوشانوۆ باۋىرلاس ەلدەر اراسىنداعى پارلامەنتتىك ديپلوماتيانىڭ باسىم باعىتتارىن اتادى.

- امانات ارقالاعان دەپۋتات رەتىندە حالىقتارىمىزدىڭ نيەتى مەن ارمان- مۇراتىن جاقسى بىلەمىز. ارينە، ەڭ اۋەلگى ماقساتىمىز - كوشباسشىلارىمىزعا تىرەك بولا وتىرىپ، تاعدىرشەشتى شەشىمدەردى زاڭنامالىق تۇرعىدا قولداۋ. دەگەنمەن، پارلامەنت زاڭ قابىلدايتىن ينستيتۋت قانا ەمەس. ول - ۇلتتارىمىزدى ۇيىستىراتىن، ەلدەرىمىزدى جاقىنداستىراتىن، زاڭنامالارىمىزدى ۇندەستىرەتىن التىن كوپىر. ءبىزدىڭ باستى ءارى تاريحي ميسسيامىز وسى دەپ ويلايمىن. اسىرەسە، قازىرگى اۋمالى- توكپەلى زاماندا پارلامەنتتىك ديالوگ پەن ديپلوماتياعا زور جاۋاپكەرشىلىك جۇكتەلىپ وتىر، - دەدى ە. قوشانوۆ.

ءماجىلىس ءتوراعاسى سونداي-اق پارلامەنتتىك ديپلوماتيا ارقىلى بىرنەشە باعىتتا جۇمىستى جانداندىرۋدى ۇسىندى.

- الدا اۋقىمدى جۇمىس كۇتىپ تۇر. ەكونوميكا، ساۋدا، ءبىلىم بەرۋ، ەكولوگيا جانە باسقا دا سالالارداعى نورمالاردى بىرىزدەندىرۋدە ۇيىمنىڭ ءرولىن كۇشەيتۋگە ءتيىسپىز. پارلامەنتتىك ديپلوماتيا ارقىلى ءبىز بىرنەشە باعىتتا جۇمىستى جانداندىرۋىمىز قاجەت دەپ سانايمىز، - دەدى ول.

ول باعىتتار:

- حالىقارالىق پارلامەنتتىك ۇيىمدارمەن ءوزارا ىقپالداستىقتى كۇشەيتۋ؛

- تۇركى ەلدەرىنىڭ مۇددەسىن العا تارتىپ، باسقا دا فورۋمداردا وكىلدىك ەتۋ؛

- گۋمانيتارلىق بايلانىسقا سەرپىن بەرۋجانە بارىمىزگە ورتاق تۇركى مادەني مۇراسىن، داستۇرلەر مەن تىلدەردى ساقتاۋعا باعىتتالعان باستامالاردى ىلگەرىلەتۋ؛

- تاجىريبە الماسۋ، تىڭ يدەيالاردى ورتاعا سالۋ ماقساتىمەن بىرلەسكەن پارلامەنتتىك فورۋمدار وتكىزۋ.

بۇعان دەيىن قازاقستان، ازەربايجان، قىرعىزستان جانە وزبەكستان جانە سولتۇستىك كيپر تۇرىك رەسپۋبليكاسى پارلامەنتتەرىنىڭ سپيكەرلەرى ۇلتتىق عارىش ورتالىعىنا بارىپ، عارىش اپپاراتتارىن قۇراستىرۋ- سىناۋ كەشەنىنىڭ جۇمىسىمەن تانىسقانىن جازعان ەدىك.