ەرلان قوشانوۆ پارلامەنت كەلەسى سەسسيادا قانداي زاڭ جوبالارىمەن جۇمىس ىستەيتىنىن ايتتى
استانا. KAZINFORM - پارلامەنت، ۇكىمەت جانە ساراپشىلار قوعامداستىعى ۇيلەسىمدى ءارى جان-جاقتى جۇمىس ىستەۋى قاجەت. بۇل تۋرالى پارلامەنتتىڭ 2-سەسسياسىنىڭ جابىلۋ راسىمىندە ءماجىلىس ءتوراعاسى ەرلان قوشانوۆ ايتتى.
«ءبىز الداعى زاڭ شىعارۋ جۇمىسىنىڭ بەرىك نەگىزىن قالادىق. قىرۋار جۇمىس اتقارىلدى. كەشە عانا ءوز سوزىندە پرەزيدەنتىمىز قاسىم- جومارت توقايەۆ پارلامەنت جۇمىسىنا وڭ باعاسىن بەردى. كەلەسى سەسسيادا دا وسى قارقىننان تايماۋىمىز قاجەت. ەڭ الدىمەن مەملەكەت باسشىسىنىڭ باستامالارىن زاڭنامالىق تۇرعىدان قامتاماسىز ەتۋگە باسا نازار اۋدارۋىمىز كەرەك. پرەزيدەنتتىڭ سايلاۋالدى باعدارلاماسىن ورىنداۋ نەگىزگى باسىمدىق بولىپ قالا بەرەدى. ەلىمىزدىڭ جاڭا ەكونوميكالىق مودەلىنىڭ قۇقىقتىق نەگىزىن قالىپتاستىرۋ جۇمىسىن جالعاستىرامىز. دەپۋتاتتار الداعى كەزەڭدە دە ەلدەگى باستى ماسەلەلەردى شەشىپ، حالقىمىزدىڭ ءال- اۋقاتىن ارتتىرۋعا اتسالىسۋى كەرەك. وسىناۋ وزگەرىستەردىڭ ناتيجەسىن ءار ازامات، ءار وتباسى ناقتى سەزىنۋى قاجەت»، - دەدى ءماجىلىس ءتوراعاسى.
ونىڭ اتاپ وتۋىنشە، قازىرگى كەزدە پارلامەنت قورجىنىندا 71 زاڭ جوباسى بار.
«دەپۋتاتتىق كورپۋس ەندى بيۋدجەت، سالىق، قۇرىلىس، سۋ كودەكستەرى بويىنشا جۇمىس ىستەيتىن بولادى. سونىمەن قاتار ءبىز مۇلدەم جاڭا سيفرلىق كودەكستى كۇتىپ وتىرمىز. الدىمىزدا سىبايلاس جەمقورلىققا قارسى ءىس- ارەكەت، ەسىرتكىمەن كۇرەس، ءدىن، سوت جۇيەسىندەگى رەفورمالار جانە باسقا دا ماسەلەلەرگە قاتىستى زاڭ جوبالارى بويىنشا اۋقىمدى جۇمىس كۇتىپ تۇر. پارلامەنت، ۇكىمەت جانە ساراپشىلار قوعامداستىعى ۇيلەسىمدى ءارى جان- جاقتى جۇمىس ىستەۋى قاجەت. وسىلاي تىعىز بايلانىس جاساۋ ارقىلى عانا العا قويعان ماقساتتارعا قول جەتكىزىپ، ەلىمىزدەگى وزەكتى پروبلەمالاردى شەشۋگە ىقپال ەتە الامىز دەپ سەنەمىن»، - دەدى ەرلان قوشانوۆ.
اۆتور
مارلان جيەمباي
