ەرلان قارين ساياسيلاندىرۋعا بولمايتىن تاقىرىپتاردى اتادى
استانا. KAZINFORM - مەملەكەتتىك كەڭەسشى ەرلان قارين ساياسيلاندىرۋعا بولمايتىن، ەموتسياسىز، سالماقتى پىكىرالماسۋ قاجەت تاقىرىپتاردى اتادى.
Qazaqstan تەلەارناسىنىڭ باس تاقىرىپ باعدارلاماسىندا مەملەكەتتىك كەڭەسشىگە «قوعامدىق پىكىرتالاس كەزىندە اتتاپ كەتۋگە بولمايتىن شەك، ياعني، رەدلاين بولۋ كەرەك دەدىڭىز. بۇل ۇستانىم قانشالىقتى دۇرىس؟ بۇل ۇستانىمنىڭ سوڭى تسەنزۋراعا الىپ بارماي ما؟»، - دەگەن ساۋال قويىلعان ەدى.
وسى ورايدا ەرلان قارين بيلىك ءوزىنىڭ ۇستانىمدارىن قوعامعا اشىق، بۇلتارتپاي جاريالاۋى كەرەكتىگىن باسا ايتتى.
«ونىڭ ۇستىنە بۇل رەتتە جاسىرىپ ايتاتىنداي نەمەسە باسقاشا قابىلدانۋى مۇمكىن دەپ ۋايىمدايتىنداي نەگىز جوق دەپ ويلايمىن. سەبەبى بيلىك ءوز ۇستانىمدارىن الدىمەن اشىق جەتكىزۋى ءتيىس جانە بۇل ۇستانىمدار بارىنە قاجەت. ول قانداي ماسەلە؟ مەنىڭ ايتپاعىم، ەلىمىزدە سوڭعى جىلدارى جۇزەگە اسقان ساياسي رەفورمانىڭ ناتيجەسىندە پليۋراليزم، ياعني، كوزقاراس الۋانتۇرلىلىگى، پىكىر الۋانتۇرلىگى ابدەن ورنىقتى. الەۋمەتتىك جەلىدەن، باسقا جەرلەردەن قارايتىن بولساق، بيلىكتى سىناۋدى ايتپاعاننىڭ وزىندە كەز كەلگەن ماسەلەنى كوتەرىپ، ايتىپ جاتادى. قالاعان فورماسىندا جەتكىزەدى. قالاعان تاقىرىپتى كوتەرىپ، قوزعايدى. ءبىراق، وسى جاعدايدا كەيبىر تاقىرىپتار، ونىڭ ىشىندە ءدىن، ءتىل، ۇلتارالىق قاتىناستار، سىرتقى ساياسات ماسەلەلەرى بويىنشا قاتتى ەموتسياعا بەرىلمەي، بايىپتى، سالماقتى پىكىرتالاس جاساۋ قاجەت. بۇل تاقىرىپتاردى تالقىلاۋعا تىيىم سالىنادى دەگەندى بىلدىرمەيدى. ءبىراق، بۇل تاقىرىپتاردى ساياسيلاندىرماي، ەموتسياسى، سالماقتى پىكىرالماسۋ قاجەت. سەبەبى كوپ مەملەكەتتەردىڭ تۇبىنە جەتكەن وسى تاقىرىپتار توڭىرەگىندەگى داۋلار. ءبىزدىڭ دە قوعام ءارتۇرلى، بىركەلكى ەمەس. ەركىندىك، بوستاندىق جانە ءتارتىپ ۇعىمدارىنىڭ قۇندىلىقتارى ءبىر- بىرىنە قايشى ەمەس»، - دەدى ەرلان قارين.
