ەرلان قارين ساراپشىلارمەن بىرگە ىشكى ساياسات ماسەلەلەرى جونىندە جيىن وتكىزدى
استانا. KAZINFORM - ەرلان قارين ساراپشىلارمەن بىرگە ىشكى ساياسات ماسەلەلەرى جونىندەگى جيىن وتكىزدى، دەپ حابارلايدى اقوردانىڭ باسپا ءسوز قىزمەتى.
باسقوسۋدى قازاقستاننىڭ ستراتەگيالىق زەرتتەۋلەر ينستيتۋتى ۇيىمداستىردى.
كەزدەسۋگە اندرەي چەبوتاريەۆ، الۋا جولدىبالينا، تالعات قاليەۆ، ايگۇل ءسادۋاقاسوۆا، نيكيتا شاتالوۆ، قارلىعاش جامانقۇلوۆا، عازيز ابىشيەۆ، ايگۇل زابيروۆا، نۇربەك ماتجاني، جانار سانحايەۆا، ءامينا ۇرپەكوۆا سەكىلدى بەلگىلى ساياساتتانۋشىلار مەن الەۋمەتتانۋشىلار قاتىستى.
جيىندا مەملەكەت باسشىسى قاسىم-جومارت توقايەۆتىڭ بيىل ناۋرىز ايىندا بۋرابايدا وتكەن ۇلتتىق قۇرىلتايدىڭ IV وتىرىسىندا كوتەرگەن باستامالارىن جۇزەگە اسىرۋ جولدارى مەن تاسىلدەرى تالقىلاندى.
- باسقوسۋدا ىشكى ساياسات سالاسىنا قاتىستى ءبىرتۇتاس كەشەندى قۇجاتتى دايارلاۋ ۇدەرىسىنە باسا نازار اۋدارىلدى. قۇجاتتىڭ نەگىزگى جوباسىن قازاقستاننىڭ ستراتەگيالىق زەرتتەۋلەر ينستيتۋتى ازىرلەگەنىن اتاپ ءوتۋىمىز كەرەك. بۇعان قوسا اتالعان جۇمىسقا ۇلتتىق قۇرىلتايدىڭ مۇشەلەرى دە اتسالىستى. پىكىر الماسۋ بارىسىندا مەملەكەتتىك كەڭەسشى ىشكى ساياسات سالاسىنا قاتىستى كەشەندى قۇجاتتى دايىنداۋ جانە قابىلداۋ، تۇپتەپ كەلگەندە، مەملەكەتتىك ورگاندار قىزمەتىن جۇيەلەۋ جولىنداعى اۋقىمدى ءىستىڭ ءبىر بولىگى ەكەنىن اتاپ ءوتتى. قۇجاتتا ىشكى ساياسات سالاسىنداعى نەگىزگى قاعيداتتار، تۇجىرىمدار جانە باعىتتار رەتكە كەلتىرىلەدى، - دەلىنگەن حابارلامادا.
ساراپشىلار ءوز كەزەگىندە اتالعان قۇجاتتىڭ مەملەكەتتىك ورگاندار قىزمەتىنە باعدار بەرىپ قانا قويماي، ازاماتتىق قوعام وكىلدەرى مەن ساراپشىلار ءۇشىن ىشكى ساياسات سالاسىنداعى نەگىزگى باسىمدىقتار جونىندە ايقىن تۇسىنىك قالىپتاستىراتىنىنا نازار اۋداردى.
جيىنعا قاتىسۋشىلار قۇجات جوباسىن جەتىلدىرۋگە جانە تولىقتىرۋعا قاتىستى ويلارى مەن ۇسىنىستارىن ورتاعا سالدى.
كەشەندى قۇجات جوباسىن تالقىلاۋعا ارنالعان مۇنداي كەزدەسۋلەر الداعى ۋاقىتتا دا ۇيىمداستىرىلادى.
وسىعان دەيىن ەرلان قارين بالالاردىڭ قاۋىپسىزدىگىن قامتاماسىز ەتۋگە قاتىستى جيىن وتكىزگەنىن جازدىق.
