ەرلان قارين جەمقورلىققا قارسى كۇرەس كوميسسيانىڭ وتىرىسىن وتكىزدى
استانا. KAZINFORM - مەملەكەتتىك كەڭەسشى ەرلان قاريننىڭ توراعالىعىمەن سىبايلاس جەمقورلىققا قارسى ءىس-قيمىل ماسەلەلەرى جونىندەگى كوميسسيانىڭ وتىرىسى ءوتتى، دەپ حابارلايدى اقوردا.
جيىندا ەكونوميكالىق ىنتىماقتاستىق جانە دامۋ ۇيىمىنىڭ (ە ى د ۇ) سىبايلاس جەمقورلىققا قارسى كۇرەس جونىندەگى ىستانبۇل جوسپارىنا سايكەس مونيتورينگتىڭ بەسىنشى راۋندىن جۇزەگە اسىرۋ ماسەلەلەرى قاراستىرىلدى.
ءىس-شارا بارىسىندا سىبايلاس جەمقورلىققا قارسى ءىس-قيمىل اگەنتتىگىنىڭ وكىلدەرى سالاعا قاتىستى ۇلتتىق زاڭنامانى جانە حالىقارالىق ستاندارتتاردى ەنگىزۋ ارقىلى قۇقىق قولدانۋ تاجىريبەسىن جەتىلدىرۋ بويىنشا قابىلدانعان شارالار تۋرالى باياندادى.
ەرلان قارين ءوز سوزىندە مەملەكەت باسشىسىنىڭ ەكونوميكالىق ىنتىماقتاستىق جانە دامۋ ۇيىمىمەن ىقپالداستىققا باسا نازار اۋداراتىنىن اتاپ ءوتتى. بۇل ۇيىمنىڭ جوعارى ستاندارتتارى ەكونوميكانىڭ ءتۇرلى سالالارىمەن بىرگە سىبايلاس جەمقورلىققا قارسى ءىس- قيمىل ماسەلەلەرىن دە قامتيدى.
جيىن سوڭىندا مەملەكەتتىك كەڭەسشى شەتەلدىك ساراپشىلاردىڭ ۇسىنىستارىن جۇزەگە اسىرۋعا جانە اتالعان بەدەلدى حالىقارالىق ۇيىممەن بايلانىستى ودان ءارى نىعايتۋعا قاتىستى ءبىرقاتار تاپسىرما بەردى.
