ەرلان قارين: بۇگىن ەلىمىزدە ا ە س سالۋ ماسەلەسىنە قاتىستى اقپاراتتىق-ءتۇسىندىرۋ جۇمىسى اياقتالادى

استانا. KAZINFORM - بۇگىن ەلىمىزدە اتوم ەلەكتر ستانساسىن سالۋ ماسەلەسىنە قاتىستى رەفەرەندۋم اياسىندا تۋرا 400 كۇنگە سوزىلعان اقپاراتتىق-ءتۇسىندىرۋ جۇمىسى اياقتالادى. بۇل تۋرالى ق ر مەملەكەتتىك كەڭەسشىسى ەرلان قارين ءمالىم ەتتى.

«ونى قازاقستاننىڭ ساياسي تاريحىنداعى ەڭ ۇزاق ناۋقان دەۋگە تولىق نەگىز بار. نەگە 400 كۇن؟ سەبەبى مەملەكەت باسشىسى رەفەرەندۋم وتكىزۋ تۋرالى يدەياسىن بىلتىر، ياعني 2023 -جىلعى 1-قىركۇيەكتە كەزەكتى جولداۋىندا ايتتى. ءدال سول كۇنى رەفەرەندۋمعا قاتىستى اۋقىمدى جۇمىس باستالدى دەۋگە بولادى. وسى ۋاقىت ىشىندە ءار ايماقتا قوعامدىق تىڭداۋ ۇيىمداستىرىلدى، اقپارات كەڭىستىگىندە ساراپشىلار مەن قوعام بەلسەندىلەرى جان-جاقتى پىكىر الماستى»، - دەپ جازدى ەرلان قارين ءوزىنىڭ Telegram ارناسىندا.

مەملەكەتتىك كەڭەسشى وسى ناۋقان بايسالدى تۇردە، ءوزارا تۇسىنىستىك جاعدايىندا وتكەنىن ايتتى. ونىڭ ايتۋىنشا، رەفەندۋم كەزىندە ەلىمىزدەگى قوعامدىق كۇشتەر العاش رەت ساياسي ەمەس، ەكونوميكالىق مۇددە تۇرعىسىنان كۇش-جىگەرىن بىرىكتىرگەنىن اتاپ وتكەن ءجون.

«AMANAT» پارتياسىنىڭ باستاماسىمەن 6 ساياسي پارتيا جانە 20-دان استام قوعامدىق بىرلەستىك اتوم ەلەكتر ستانساسىن سالۋدى قولداۋ جونىندەگى حالىقتىق شتاب قۇردى. شتاب مۇشەلەرى بارلىق ءوڭىردىڭ تۇرعىندارىمەن كەزدەسۋ وتكىزدى، وعان ەنەرگەتيكا سالاسىنىڭ جەتەكشى ساراپشىلارى مەن ماماندارى قاتىستى. وسىلايشا، ازاماتتارىمىزدىڭ قازاقستاندا اتوم ەنەرگەتيكاسىن دامىتۋعا قاتىستى بايىپتى توقتامعا كەلۋىنە مۇمكىندىك بەرىلدى»، - دەدى مەملەكەتتىك كەڭەسشى.