رەكورد: استانا اۋەجايى 7,5 ميلليونىنشى جولاۋشىسىن قارسى الدى
استانا حالىقارالىق اۋەجايى 7 جارىم ميلليونىنشى جولاۋشىعا قىزمەت كورسەتتى. بۇل - استانا اۋەجايى ءۇشىن رەكوردتىق كورسەتكىش، دەپ حابارلايدى Kazinform.
كولىك مينيسترلىگىنىڭ مالىمەتىنشە، ەلوردا اۋەجايىنىڭ 7 جارىم ميلليونىنشى جولاۋشىسى KC853 رەيسىمەن الماتى- استانا باعىتىمەن ۇشىپ كەلگەن سەيىتقازييەۆتەر وتباسى بولدى.
«ءبىز الماتىداعى تۋىستارىمىزعا بارىپ، قوناق بولىپ، ۇيىمىزگە كەلە جاتىرمىز. ءبىراق رەيستەن ءبىزدى اۋەجايدىڭ باسشىلىعىنىڭ ءوزى كۇتىپ الىپ، ەرەكشە قوناق بولامىز دەپ مۇلدە ويلاعان جوقپىز. قازىردىڭ وزىندە تاڭدانىسىمىزدى جاسىرا الماي تۇرمىن. مۇنىڭ ءبارى ۇلىم مانسۇردىڭ نەسىبەسى شىعار دەپ ويلايمىن. وسىلاي جىلى قارسى العاندارىڭىز ءۇشىن مىڭ راقمەت!»، - دەدى سەيىتقازيەۆتەر وتباسىنىڭ وتاعاسى باۋىرجان.
«استانا حالىقارالىق اۋەجايى جىلدان-جىلعا الەمدىك اۆياتسيالىق قوعامداستىقتا ءوزىنىڭ تانىمالدىعى مەن ماڭىزدىلىعىن دالەلدەپ كەلە جاتىر. 2023 -جىلى استانا حالىقارالىق اۋەجايىنان ازەربايجان اۋەكومپانيالارى، RedSea ،AirCairo ،MaviGok اۋەكومپانيالارى تۇراقتى رەيستەر ورىنداي باستادى. بۇگىن اۋەجايىمىزدىڭ تاريحىندا جاڭا رەكورد ورنادى. بىلتىر 6 ميلليون جولاۋشى قابىلداساق، بيىل كورسەتكىش 25 پايىزعا ارتىپ، ەلوردا اۋەجايى 7 جارىم ميلليونىنشى جولاۋشىعا قىزمەت كورسەتىپ جاتىر»، - دەدى اۋەجايدىڭ باسقاراما ءتوراعاسى ەرعازى جولداسوۆ.
قاراشادا استانا حالىقارالىق اۋەجايى Terminals Holding كومپانياسىمەن بىرلەسكەن جۇمىستى باستادى. ينۆەستور ەلوردا اۋەجايىنداعى ۇشۋ قونۋ جولاعىن كۇردەلى جوندەۋدەن وتكىزۋدى جانە جولاۋشىلارعا قىزمەت كورسەتۋ ساپاسىن ارتتىرۋدى جوسپارلاپ وتىر. ناتيجەسىندە جولاۋشىلار اعىنىن 2 ەسە كوبەيتىپ، 14 ميلليونعا جەتكىزۋ كوزدەلىپ وتىر.
استانا اۋەجايىنان تاۋلىگەن ورتا ەسەپپەن 200 دەن اسا رەيس ورىندالادى. 11 ايدىڭ كورسەتكىشى بويىنشا جىل باسىنان 30 مىڭ رەيس ورىندالعان.
