ەرەكشە قورعالاتىن تابيعي اۋماقتاردى پايدالانعانى ءۇشىن تولەم ۇلتتىق پاركتەردىڭ ەسەبىندە قالادى
استانا. قازاقپارات - 2024-جىلى 8-شىلدەدە مەملەكەت باسشىسى «ق ر كەيبىر زاڭنامالىق اكتىلەرىنە ەرەكشە قورعالاتىن تابيعي اۋماقتار جانە ەلەكتر ەنەرگەتيكاسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى.
زاڭنامادا قانداي باستى وزگەرىستەر قامتىلدى؟
سالىق كودەكسىنەن ەرەكشە قورعالاتىن تابيعي اۋماقتاردى (ە ق ت ا) پايدالانعانى ءۇشىن الىناتىن تولەم رەسپۋبليكالىق بيۋجەتكە تۇسەتىنى تۋرالى نورمالار الىنىپ تاستالدى.
سايكەسىنشە، ق ر بيۋجەت كودەكسىنىڭ رەسپۋبليكالىق جانە جەرگىلىكتى ماڭىزى بار ەرەكشە قورعالاتىن تابيعي اۋماقتاردى پايدالانعانى ءۇشىن بيۋجەت تۇسىمدەرى قاراستىرىلعان نورمالارى وزگەردى.
تابيعات قورعاۋ مەكەمەلەرى كورسەتەتىن قىزمەتتەر ءۇشىن تاريفتەردىڭ مولشەرىن بەكىتۋ قۇزىرەتى ە ق ت ا- نى باقىلايتىن مەملەكەتتىك ورگاندارعا بەرىلىپ وتىر.
ياعني، ەرەكشە قورعالاتىن تابيعي اۋماقتاردى پايدالانعانى ءۇشىن كورسەتىلەتىن قىزمەتتەردىڭ تولەمى بۇرىنعىسىنشا الىنادى، ءبىراق ول بىردەن ۇلتتىق پاركتەردىڭ ارنايى شوتىندا قالىپ، ولاردىڭ قاجەتتىلىكتەرىنە جۇمسالادى (قىزمەتكەرلەردىڭ جالاقىسىنا، تابيعاتتى قورعاۋ ءىس-شارالارىنا سونداي-اق: باقىلاۋ-وتكىزۋ بەكەتتەرىن اۆتوماتتاندىرۋ، تۋريستىك مارشۋرتتاردى جانە سوقپاقتاردى جاقسارتۋ، قاۋىپسىزدىك جۇيەسىن جەتىلدىرۋ ت. ب. سىندى ەرەكشە قورعالاتىن اۋماقتى دامىتۋعا).
ە ق ت ا قىزمەتتەرى ءۇشىن تولەم الۋ جونىندەگى نورما «ەرەكشە قورعالاتىن تابيعي اۋماقتار تۋرالى» ق ر زاڭىنىڭ 38-بابى ارقىلى، سونداي-اق ەكولوگيا، گەولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتى ءتوراعاسىنىڭ 2020-جىلعى 30-جەلتوقسانداعى 27-5-6/253-بۇيىعىمەن («ءوزىنىڭ قاراۋىنداعى زاڭدى تۇلعا مارتەبەسى بار رەسپۋبليكالىق ماڭىزى بار ەرەكشە قورعالاتىن تابيعي اۋماقتار كورسەتەتىن قىزمەتتەر ءۇشىن تاريفتەردىڭ مولشەرىن بەكىتۋ تۋرالى») بەكىتىلگەن.
تاريف مولشەرىمەن ق ر ەكولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ سايتىندا تانىسۋعا بولادى.
