پرجيەۆال جىلقىسىن قازاقستانعا جەرسىندىرۋ ءۇشىن زەرتتەۋ جۇرگىزىلدى

استانا. KAZINFORM - پرجيەۆال جىلقىسىن قازاقستاندا جەرسىندىرۋ ءۇشىن ماماندار 3-4 جىل عىلىمي زەرتتەۋ جۇمىستارىن جۇرگىزدى. بۇل تۋرالى ورمان شارۋاشىلىعى جانە جانۋارلار دۇنيەسى كوميتەتىنىڭ ءتوراعاسى دانيار تۇرعامبايەۆ ءمالىم ەتتى.

«جابايى اڭ، جانۋارلاردى جەرسىندىرۋ الدىندا عىلىمي زەرتتەۋ جۇمىستارى جۇرگىزىلەدى. ياعني ول جەردىڭ تابيعاتى، اۋا رايى، جەرى مەن سۋى زەرتتەلەدى. پرجيەۆال جىلقىسىن ەلىمىزگە اكەلۋ ءۇشىن ماماندار 3-4 جىل بويى زەرتتەۋ جۇرگىزدى. چەحيا ەلىمەن مەموراندۋمعا قول قويعان كەزدە، العاشقى پرجيەۆال جىلقىلارىن ەلگە 2025-جىلى اكەلەمىز دەپ ويلاعانبىز. ءبىراق، چەحيالىق ماماندار بىزدەگى دايىندىق جۇمىستارىن كورگەن سوڭ، ولارمەن بيىلدان باستاۋعا كەلىستىك»، - دەدى دانيار تۇرعامبايەۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

كوميتەت ءتوراعاسىنىڭ ايتۋىنشا، پرجيەۆال جىلقىسىن جەرسىندىرۋدە قاۋىپ بار.

«چەحيالىق ماماندار قوستاناي وبلىسىنا كەلىپ، بىرنەشە زەرتتەۋ جۇمىستارىن جاسادى. ونىڭ ناتيجەسىندە جابايى جىلقىلار ءۇشىن ءوڭىر اۋا رايى قولايلى دەگەن شەشىم قابىلدادى»، - دەيدى ول.

بۇعان دەيىن قوستاناي وبلىسىنداعى «التىن دالا» رەزەرۆاتىنا پراگادان سەگىز باس پرجيەۆال جىلقىسى جەتكىزىلەتىنى تۋرالى حابارلاعان ەدىك.