رەفەرەندۋمدا ورەسكەل زاڭ بۇزۋشىلىقتار تىركەلگەن جوق – ءى ءى م
استانا. KAZINFORM - ىشكى ىستەر مينيسترلىگى رەسپۋبليكالىق رەفەرەندۋم كەزىندە قۇقىقتىق ءتارتىپ پەن قوعامدىق قاۋىپسىزدىكتى قامتاماسىز ەتۋدى جالعاستىرۋدا.
«بۇگىندە 33 مىڭنان استام پوليتسيا قىزمەتكەرى مەن ۇلتتىق ۇلاننىڭ اسكەري قىزمەتشىلەرى تاۋلىك بويى قىزمەت اتقارۋدا. ەلدەگى قوعامدىق احۋال تۇراقتى، قانداي دا ءبىر ورەسكەل زاڭ بۇزۋشىلىقتار تىركەلگەن جوق. پوليتسيانىڭ جەدەل باسقارۋ ورتالىقتارىنىڭ بەينەباقىلاۋ كامەرالارىن پايدالانا وتىرىپ، كوشەلەر مەن داۋىس بەرۋ ۋچاسكەلەرىن باقىلاۋ جۇمىستارى جۇرگىزىلىپ جاتىر. داۋىس بەرۋ ۋچاسكەلەرىندەگى وقيعالارعا ۋاقتىلى دەن قويۋ ءۇشىن ءاربىر اۋداندا موبيلدىك جەدەل توپتار قۇرىلدى»، - دەدى مينيسترلىكتىڭ رەسمي وكىلى شىڭعىس الەكەشيەۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ءى ءى م وكىلىنىڭ ايتۋىنشا، ازاماتتار مەن داۋىس بەرۋ كوميسسيالارىنىڭ كەز كەلگەن ءوتىنىش، شاعىمدارىنا ىشكى ىستەر ورگاندارى جەدەل دەن قويىپ، ءتيىستى شارالار قابىلداپ جاتىر.
«قۇرمەتتى ازاماتتار، ىشكى ىستەر مينيسترلىگى پوليتسيا قىزمەتكەرلەرىنىڭ زاڭدى تالاپتارىنا تۇسىنىستىكپەن قاراۋدى سۇرايدى. قوعامدىق ءتارتىپ بۇزىلعان جاعدايدا ىشكى ىستەر مينيسترلىگىنىڭ كەزەكشى بولىمدەرىنە نەمەسە «102» جەلىسىنە حابارلاسۋى قاجەت. ەگەر قۇقىق بۇزۋشىلىق تىكەلەي داۋىس بەرۋ ۋچاسكەسىندە بولسا، ءسىز پوليتسيا قىزمەتكەرىنە نەمەسە كوميسسيا ءتوراعاسىنا جۇگىنە الاسىزدار»، - دەيدى ول.
بۇعان دەيىن باس پروكۋراتۋرا وكىلى رەفەرەندۋمدا ەكى زاڭ بۇزۋ فاكتىسى تىركەلگەنىن مالىمدەگەن ەدى.
