رەفەرەندۋمدا ەكى زاڭ بۇزۋ فاكتىسى تىركەلدى - باس پروكۋراتۋرا
استانا. KAZINFORM - رەفەرەندۋم ءوتىپ جاتقاندا ساۋالناما جۇرگىزىپ جانە ۇگىت-ناسيحات جۇرگىزگەن ەكى ازامات انىقتالدى. بۇل تۋرالى باس پروكۋراتۋرا قوعامدىق مۇددەلەردى قورعاۋ قىزمەتىنىڭ باسقارما باستىعى بەكجان قارامانوۆ ءمالىم ەتتى.
«رەفەرەندۋمدا داۋىس بەرۋ قالىپتى جاعدايدا وتۋدە. بۇگىندە ەكى زاڭ بۇزۋ فاكتىسى انىقتالدى. ءبىرىنشىسى، جەكە تۇلعا مەن قوعامدىق پىكىرگە زاڭسىز ساۋالناما جۇرگىزۋگە قاتىستى. ول اكىمشىلىك-قۇقىقبۇزۋشىلىق تۋرالى كودەكستىڭ 120-بابى 3-بولىگى بويىنشا جاۋاپقا تارتىلدى، ياعني ايىپپۇل سالىندى. ەكىنشىسى، زاڭسىز ۇگىت جۇرگىزۋ فاكتىسى انىقتالدى. ول بويىنشا ازاماتقا جوعارىدا اتالعان كودەكستىڭ 102-بابى بويىنشا ايىپپۇل سالىندى»، - دەدى بەكجان قارامانوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، ەكى جاعدايدا دا قۇقىق بۇزۋشىلار ءوز كىناسىن مويىندادى.
«وسى جايتتاردى ەسكەرە وتىرىپ، رەفەرەندۋمعا قاتىسۋشىلاردىڭ نازارىن، داۋىس بەرۋ كۇنى، ناقتى ايتقاندا بۇگىن ساۋالناما جۇرگىزىپ، ۇگىت-ناسيحات جۇرگىزۋگە تىيىم سالىناتىنىن ەسكە سالامىز. قازىرگى ۋاقىتتا پروكۋراتۋرالار مەن سوتقا رەفەرەندۋمعا قاتىستى ارىز-شاعىم تۇسكەن جوق. پروكۋراتۋرا ورگاندارى مەن رەسپۋبليكالىق رەفەرەندۋم وتكىزۋدىڭ زاڭدىلىعىن قامتاماسىز ەتۋ جالعاسۋدا»، - دەيدى ول.
