رەفەرەندۋم: تۇركى مەملەكەتتەرى ۇيىمىنىڭ بايقاۋشىلارى كەزدەيسوق تاڭدالعان 17 ۋچاسكەگە باردى
استانا. KAZINFORM - تۇركى مەملەكەتتەرىنىڭ ۇيىمى بايقاۋشىلار ميسسياسى رەفەرەندۋم كۇنى كەزدەيسوق تاڭدالعان 17 ۋچاسكەگە باردى.
بۇل تۋرالى ميسسيا باسشىسى، تۇركى مەملەكەتتەرىنىڭ ۇيىمى باس حاتشىسىنىڭ ورىنباسارى سادي دجافاروۆ ايتىپ بەردى.
«ءبىز 17 ۋچاسكەنىڭ بارلىعىندا قاجەتتى اقپارات، رەفەرەندۋمعا قاتىستى ماتەريالدار بەرىلگەنىن كوردىك. سونداي-اق، كوميسسيا قاتىسۋشىلارى بارلىق ءىس-شارالاردىڭ اشىقتىعىن قامتاماسىز ەتۋگە جاردەمدەسۋدە. ءبىز مونيتورينگكە تولىق قول جەتكىزە الدىق جانە وسى ۋاقىتقا دەيىن سايلاۋ كوميسسيالارىنىڭ قىزمەتىنە اكىمشىلىك نەمەسە قۇقىق قورعاۋ ورگاندارى تاراپىنان زاڭسىز ارالاسۋ جاعدايلارىن بايقامادىق»، - دەدى سادي دجافاروۆ استانادا حالىقارالىق بايقاۋشىلارعا قولعابىس كورسەتۋ ورتالىعىندا وتكەن بريفينگتە.
سپيكەر بايقاۋشىلار ميسسياسىنىڭ ۋچاسكەلەردەگى سايلاۋ كوميسسياسى مۇشەلەرىنەن بارلىق قاجەتتى اقپاراتتى الا العانىن اتاپ ءوتتى.
ميسسيا ءوز جۇمىسىن كۇن سوڭىنا دەيىن جالعاستىرادى، سونىمەن قاتار بۇگىن كەشكە سايلاۋ ۋچاسكەلەرىنىڭ بىرىندە داۋىستاردى ساناۋ پروتسەسىنە قاتىسادى.
ەسكە سالايىق، بۇگىن قازاقستاندىقتار اتوم ەلەكتر ستانتسياسىن سالۋ ماسەلەسى بويىنشا جالپىۇلتتىق رەفەرەندۋمدا داۋىس بەرىپ جاتىر.
رەسپۋبليكالىق رەفەرەندۋم بيۋللەتەنىندە ءبىر عانا ساۋال بولادى:
- ءسىز قازاقستاندا اتوم ەلەكتر ستانتسياسىن سالۋعا كەلىسەسىز بە؟
داۋىس بەرۋشى جاۋاپتىڭ ەكى نۇسقاسىنىڭ ءبىرىن تاڭدايدى:
- «ءيا، كەلىسەمىن» نەمەسە، «جوق، كەلىسپەيمىن».
