رەفەرەندۋم پرەزيدەنتىمىزدى حالىقتىڭ قولدايتىنىن تاعى ءبىر كورسەتىپ بەردى - ماۋلەن اشىمبايەۆ

استانا. KAZINFORM - رەفەرەندۋم پرەزيدەنتىمىز قاسىم-جومارت كەمەل ۇلى توقايەۆتىڭ ادىلەتتى قازاقستان قالىپتاستىرۋ جولىنداعى باعدارىن حالىقتىڭ قولدايتىنىن تاعى ءبىر كورسەتىپ بەردى. بۇل تۋرالى سەنات ءتوراعاسى ماۋلەن اشىمبايەۆ فەيسبۋكتەگى پاراقشاسىندا جازدى.

«بۇگىن ورتالىق رەفەرەندۋم كوميسسياسى اەس سالۋ ماسەلەسىنە قاتىستى رەسپۋبليكالىق رەفەرەندۋمدا داۋىس بەرۋدىڭ الدىن الا ناتيجەلەرىن جاريالادى. سوعان سايكەس رەفەرەندۋمعا قاتىسقان ازاماتتاردىڭ 71,12 پايىزى اتالعان ماسەلەنى قولداپ داۋىس بەرگەنى بەلگىلى بولدى. وسىلايشا، قازاقستاندىقتار ءوز تاڭداۋىن جاساپ، ەل بولاشاعىنا قاتىستى ستراتەگيالىق شەشىمدى دەموكراتيالىق جولمەن قابىلدادى.

بۇل وقيعا پرەزيدەنتىمىز قاسىم-جومارت كەمەل ۇلى توقايەۆتىڭ ادىلەتتى قازاقستان قالىپتاستىرۋ جولىنداعى باعدارىن حالىقتىڭ قولدايتىنىن تاعى ءبىر كورسەتىپ بەردى»، - دەدى سەنات ءتوراعاسى.

سونداي-اق، سەنات باسشىسى رەفەرەندۋم «حالىق ۇنىنە قۇلاق اساتىن مەملەكەت» تۇجىرىمداماسى اياسىندا جاسالعان كەزەكتى ناقتى قادامداردىڭ ءبىرى ەكەنىن اتاپ ءوتتى.

«وعان (رەفەرەندۋمعا - رەد. ) ازاماتتاردىڭ بەلسەندى قاتىسۋى ەلىمىزدە جاڭا ساياسي مادەنيەتتىڭ ورنىعا تۇسكەنىن بىلدىرەدى.

جالپى، اتوم ەلەكتر ستانساسى - تۇراقتى جانە تازا قۋات كوزى. بۇل ەنەرگيا تاپشىلىعىن ازايتۋ جانە ەكونوميكالىق دامۋ جولىندا ايرىقشا ماڭىزعا يە. سوندىقتان وسى رەفەرەندۋم جانە حالىق قابىلداعان شەشىم ەلىمىزدى جاڭا بەلەسكە شىعارادى دەپ سەنەمىز»، - دەپ ءتۇيدى ءسوزىن ماۋلەن اشىمبايەۆ.

ايتا كەتەيىك، بۇعان دەيىن قازاقستاندىقتاردىڭ 71,12 پايىزى رەفەرەندۋمدا ا ە س قۇرىلىسىن قولداپ داۋىس بەرگەنىن جازعان ەدىك.