رەفەرەندۋم: 24 ادام اكىمشىلىك جاۋاپكەرشىلىككە تارتىلدى
استانا. KAZINFORM - بۇگىن ەلوردادا ت م د بايقاۋشىلارى ميسسياسىنىڭ جەتەكشىسى لەونيد انفيموۆ 6-قازان كۇنى قازاقستاندا وتكەن رەفەرەندۋمعا قاتىستى پىكىر ايتتى.
«ت م د بايقاۋشىلارى ميسسياسىنىڭ سۇراۋى بويىنشا ق ر ورتالىق سايلاۋ كوميسسياسى، جوعارعى سوت، ىشكى ىستەر مينيسترلىگى جانە باس پروكۋراتۋرا رەفەرەندۋم ناۋقانى كەزىندە جولدانعان وتىنىشتەرگە قاتىستى اقپارات بەردى. ولاردىڭ مالىمەتىنشە، وسى ۋاقىت ارالىعىندا زاڭ بۇزۋدىڭ ساناۋلى عانا دەرەكتەرى تىركەلگەن. 24 ادام رەسپۋبليكالىق رەفەرەندۋمعا قاتىستى ساۋالناما جۇرگىزۋ ءتارتىبىن ساقتاماعانى ءۇشىن اكىمشىلىك جاۋاپكەرشىلىككە تارتىلدى. قىلمىستىق ىستەر قوزعالعان جوق. ىشكى ىستەر مينيسترلىگى رەفەرەندۋمعا قاتىستى ءبىر عانا قۇقىق بۇزۋ دەرەگىن، ياعني رەسمي دەرەكتەرسىز ءۇنپاراقتار تاراتىلعانىن حابارلادى»، - دەدى ل. انفيموۆ ق ر ورتالىق سايلاۋ كوميسسياسىندا وتكەن بريفينگىدە.
ونىڭ ايتۋىنشا، ق ر و س ك- عا نەگىزىنەن انىقتامالىق-اقپاراتتىق سيپاتتاعى 66 ءوتىنىش، ساۋال جانە ۇسىنىس كەلىپ ءتۇستى. ولار زاڭدا بەلگىلەنگەن مەرزىمدە قارالىپ، ءوتىنىش بەرگەن ادامدارعا ءتيىستى جاۋاپ بەرىلدى.
«قازاقستاندا رەفەرەندۋمدى دايىنداۋ جانە وتكىزۋ بارىسىندا زاڭ بۇزۋ وقيعالارىنا دەرەۋ ارەكەت ەتۋ ءۇشىن قاجەت جاعدايلار جاسالدى. 2024-جىلعى 6-قازانداعى رەفەرەندۋم كۇنى ت م د بايقاۋشىلارى قازاقستاننىڭ 9 وڭىرىندە - اقمولا، شىعىس قازاقستان، باتىس قازاقستان، قاراعاندى، ماڭعىستاۋ، تۇركىستان وبلىستارىندا، سونداي-اق استانا، الماتى جانە شىمكەنت قالالارىندا قىزمەتىن جۇزەگە اسىرىپ، 618 داۋىس بەرۋ ۋچاسكەسىنە باردى. ولار داۋىس بەرۋ پروتسەسىنىڭ اشىقتىعى قامتاماسىز ەتىلگەنىن مالىمدەدى. مەن ءوزىم 10 نان استام ۋچاسكەگە باردىم جانە رەفەرەندۋم وتكىزۋ جاقسى ۇيىمداستىرىلعانىنا كوز جەتكىزدىم»، - دەدى لەونيد انفيموۆ.
بۇدان بۇرىن حابارلانعانداي، بۇگىن ورتالىق رەفەرەندۋم كوميسسياسى داۋىس بەرۋدىڭ الدىن الا قورىتىندىسىن شىعاردى.
وسى رەتتە سايلاۋ ۋچاسكەلەرىنە بارعان قازاقستاندىقتاردىڭ 71,12 پايىزى رەفەرەندۋمدا ا ە س قۇرىلىسىن قولداپ داۋىس بەرگەنى ايتىلدى.
