ەردوعان وپپوزيتسيالىق پارتيا دەپۋتاتىن سوتقا بەردى

انكارا. KAZINFORM - تۇركيا پرەزيدەنتى رەجەپ تايىپ ەردوعان وپپوزيتسيالىق دەپۋتاتقا 250 مىڭ ليرا (شامامەن 7,3 مىڭ دوللار) مورالدىق شىعىندى وتەۋ جونىندە تالاپ قويدى. بۇل تۋرالى تاسس اگەنتتىگى جازدى.

- پرەزيدەنتىمىزگە قارسى نەگىزسىز جانە دورەكى مالىمدەمەلەرى ءۇشىن يزميردەگى رەسپۋبليكالىق حالىق پارتياسىنىڭ (ر ح پ) دەپۋتاتى تۋنجاي وزكانعا 250 مىڭ تۇرىك ليراسى كولەمىندە مورالدىق شىعىندى وتەۋ تۋرالى تالاپ قويىلدى. سونىمەن قاتار، انكارا باس پروكۋراتۋراسىنا پرەزيدەنتكە ءتىل تيگىزگەنى تۋرالى ارىز تۇسكەن، - دەپ جازدى تۇركيا باسشىسىنىڭ ادۆوكاتى حۋسەين ايدىن X (بۇرىنعى Twitter) پاراقشاسىندا.

بۇعان دەيىن وزكان X جەلىسىندە ەردوعان مەن ۇكىمەت شەنەۋنىكتەرىن «سارايداعى ەلىكتەگىشتەر»، «ءسان-سالتاناتتا وتىرعاندار»، «ميللياردتاعان دوللارمەن ويناعاندار» دەپ اتاعان.

ول پرەزيدەنتتىڭ ىستانبۇل مەرى ەكرەم يماموگلۋ مەن كەيبىر ر ح پ مۇشەلەرىنىڭ پاريجدەگى وليمپيادا ويىندارىنىڭ اشىلۋىنا بارعان ساپارىنا بايلانىستى سىنعا وسىلاي جاۋاپ بەرگەن.

ەردوعان بۇل ساپاردىڭ «حالىق اقشاسىن بوسقا شاشۋ» ەكەنىن ايتقان. پرەزيدەنت وزكاننىڭ رەاكسياسىن قاتاڭ ايىپتاپ، ونى ورىنسىز دەپ اتادى.

وزكاننىڭ بۇل ءسوزى ۇكىمەت مۇشەلەرىنىڭ ەرەكشە نارازىلىعىن تۋدىردى.

مينيسترلەر كابينەتىنىڭ مۇشەلەرى وپپوزيتسيالىق دەپۋتاتتى ايىپتاپ، سىنعا الدى، ال تۇركيا ادىلەت مينيسترلىگىنىڭ باسشىسى يىلماز تۋنچ وزكاننىڭ مالىمدەمەسى بويىنشا وعان قارسى تەرگەۋ باستالعانىن ايتتى.

اۆتور
جاراسقان نۇرىبايەۆ