جاتىر موينى وبىرىنىڭ «جاسارىپ» بارا جاتقانى الاڭداتادى - ونكولوگ

الماتى. KAZINFORM - الماتى ونكولوگيالىق ورتالىعىنا «جاتىر موينى وبىرىنىڭ II ساتىسى» دياگنوزىمەن 26 جاستاعى ايەل جەتكىزىلدى.

ونكوگينەكولوگيا ءبولىمىنىڭ مەڭگەرۋشىسى رايحان بولاتبەكوۆانىڭ ايتۋىنشا، ناۋقاس ءبىر جىل بويى قاندى بولىنىستەر مەن شاعىمدارعا قاراماستان دارىگەرگە جۇگىنبەگەن. ونىڭ ەكى بالاسى بار.

جاعدايى ناشارلاپ كەتكەن كەزدە عانا ول مەديتسينالىق تەكسەرۋدەن وتۋگە كەلگەن.

- ونكولوگيالىق ورتالىقتىڭ دارىگەرلەرى كۇردەلى وپەراتسيا جاسادى. جاتىر، جاتىر موينى جانە رەگيونارلىق ليمفا تۇيىندەرى الىندى. ناۋقاستىڭ جاس بولعاندىقتان، دارىگەرلەر انالىق بەزدەردى ساقتاپ قالۋ تۋرالى شەشىم قابىلدادى، بۇل بولاشاقتا سۋرروگات انا بولۋ ارقىلى انا اتانۋىنا مۇمكىندىك بەرەدى، - دەيدى رايحان بولاتبەكوۆا.

ءۇش ساعاتقا سوزىلعان وپەراتسيا ءساتتى ءوتتى، قازىر ايەل مامانداردىڭ باقىلاۋىندا جانە حيميو- ساۋلەلىك تەراپيا تۇرىندە قوسىمشا ەم قابىلداپ جاتىر.

دارىگەردىڭ سوزىنشە، الماتىدا جاتىر موينى وبىرى ايەلدەر اراسىنداعى ونكولوگيالىق اۋرۋلار ىشىندە ءسۇت بەزى وبىرىنان كەيىن ەكىنشى ورىندا تۇر. 2024 -جىلى بۇل دياگنوز 206 ايەلگە قويىلدى. نەگىزگى جاس توبى - 35-تەن 50 جاسقا دەيىنگى ايەلدەر.

- جاتىر موينى وبىرىنىڭ «جاسارىپ» بارا جاتقانى الاڭداتادى. «مىسالى، الماتىدا 20- 24 جاس ارالىعىنداعى قىز- كەلىنشەكتەردە جاتىر موينى وبىرى تىركەلىپ جاتىر. ەرتە ساتىدا بۇل اۋرۋ ايقىن بەلگىلەرسىز ءوتۋى مۇمكىن، سوندىقتان تۇراقتى پروفيلاكتيكالىق تەكسەرۋلەر مەن سكرينينگتەن ءوتۋ ارقىلى جاتىر موينى وبىرىن باستاپقى كەزەڭىندە انىقتاپ، ءساتتى ەمدەۋگە بولادى، - دەيدى ونكوگينەكولوگ.

مەملەكەتتىك باعدارلاما اياسىندا 30 دان 70 جاسقا دەيىنگى ايەلدەر ءتورت جىلدا ءبىر رەت تەگىن سكرينينگتەن وتە الادى. بۇل - سيتولوگيالىق جاعىندى الۋ ارقىلى جۇرگىزىلەتىن، ەرتە دياگنوز قويۋدىڭ قاراپايىم ءارى قولجەتىمدى ءادىسى.

دارىگەرلەر بارلىق ايەلگە ءتىپتى بولماشى بەلگىلەردىڭ ءوزىن ەلەمەۋگە بولمايتىندىعىن جانە گينەكولوگقا تۇراقتى تۇردە بارۋعا كەڭەس بەرەدى. 26 جاستاعى ناۋقاستىڭ جاعدايىندا كەشىگۋ وعان رەپرودۋكتيۆتى فۋنكتسياسىن ساقتاۋ مۇمكىندىگىنەن ايىرىلۋىنا سەبەپ بولدى.

وسىعان دەيىن جاتىر موينى وبىرىنىڭ قالاي الدىن الۋعا بولاتىنى تۋرالى جازعان بولاتىنبىز.

اۆتور

الما مۇقانوۆا