ەردوعان ماسكەۋ مەن كيەۆ اراسىنداعى تىكەلەي كەلىسسوزدەرگە الاڭ ۇسىندى
استانا. KAZINFORM - انكارا رەسەي مەن ۋكراينا اراسىنداعى قاقتىعىستى بەيبىت جولمەن رەتتەۋدە شەشۋشى ءرول اتقارۋعا دايىن ەكەنىن تاعى دا مالىمدەدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
تۇركيا پرەزيدەنتى رەجەپ تايىپ ەردوعان ۋكراينا پرەزيدەنتى ۆلاديمير زەلەنسكيمەن كەزدەسۋىندە تاراپتار اراسىنداعى ديالوگ ارنالارىن اشىق ۇستاۋ نيەتىن قۋاتتاپ، ەكى ەلدىڭ باسشىلارى كەلىسسە، ولاردى تىكەلەي كەلىسسوزدەر ءۇشىن قابىلداۋعا ءازىر ەكەنىن جەتكىزدى.
تۇركيا پرەزيدەنتى جانىنداعى قوعامدىق بايلانىستار ديرەكتوراتتىڭ مالىمەتىنشە، ەردوعان بەيبىتشىلىكتىڭ ورناۋىن بارىنشا تەزدەتۋدىڭ ماڭىزدىلىعىن اتاپ ءوتىپ، ديالوگقا تەحنيكالىق دەڭگەيدە دە، مەملەكەت باسشىلارى دەڭگەيىندە دە تولىق قولداۋ ءبىلدىردى.
ول قاقتىعىستى تەك تىكەلەي كەلىسسوزدەر جانە ورتاق قاعيدالاردى تابۋ ارقىلى شەشۋ قاجەتتىگىن، بۇل ادام شىعىنىن ازايتۋ ءۇشىن ماڭىزدى ەكەنىن ايتتى.
وسى ديپلوماتيالىق سەرپىن اياسىندا ىستانبۇلدا كەلىسسوزدەر ۇدەرىسىن قايتا باستاۋ باعىتىندا جۇمىس جانداندى.
رەسەي دەلەگاتسياسىنىڭ باسشىسى ۆلاديمير مەدينسكيدىڭ ايتۋىنشا، رەسەيدىڭ باستى ماقساتى – ۇزاق مەرزىمدى بەيبىتشىلىككە قول جەتكىزۋ جانە قاقتىعىستىڭ تۇپكى سەبەپتەرىن جويۋ. ىستانبۇلداعى كەلىسسوزدەر 2022-جىلى ۇزىلگەن بەيبىت ۇدەرىستىڭ جالعاسى رەتىندە قاراستىرىلىپ وتىر.
پرەزيدەنت زەلەنسكيدىڭ سوزىنشە، ۋكراينا دەلەگاتسياسى - قورعانىس ءمينيسترى رۇستەم ۋمەروۆتىڭ جەتەكشىلىگىمەن ىستانبۇلدا 16-مامىرعا دەيىن قالىپ، كەلىسسوزدەردى جالعاستىرۋعا دايىن. زەلەنسكي بۇل شەشىم ەردوعان مەن ا ق ش پرەزيدەنتى دونالد ترامپتىڭ كۇش-جىگەرىنە قۇرمەت رەتىندە قابىلدانعانىن جانە شيەلەنىستى باسەڭدەتۋگە باعىتتالعان العاشقى قادامدارعا ءۇمىت ارتاتىنىن اتاپ ءوتتى.
بۇعان دەيىن جازعانىمىزداي، ىستانبۇلداعى رەسەي-ۋكراينا كەلىسسوزى كەيىنگە شەگەرىلدى.
