ەردوعان جاڭا كونستيتۋتسيا قابىلداۋعا شاقىردى
استانا. KAZINFORM - تۇركيادا ەلدىڭ جاڭا كونستيتۋتسياسىن قابىلداۋ ماسەلەسى قايتادان كوتەرىلىپ جاتىر. بۇل تۋرالى ءبىر كۇن بۇرىن تۇرىك جاستارىمەن كەزدەسۋىندە تۇركيا پرەزيدەنتى رەجەپ تايىپ ەردوعان ءمالىم ەتتى، دەپ حابارلايدى Kazinform ءتىلشىسى.
تۇركيا باسشىسى 20 جىل بۇرىن قابىلدانعان قولدانىستاعى نەگىزگى زاڭنىڭ ەسكىرگەنىن جانە قازىرگى زامانعا ساي كەلمەيتىنىن اتاپ ءوتىپ، ەلدىڭ جاڭا كونستيتۋتسياسىن ازىرلەۋ قاجەتتىگىن ايتتى.
- تۇركيا دەموكراتيالىق، ازاماتتىق جانە جاڭارتىلعان كونستيتۋتسياعا لايىق. ءبىز بۇل پروتسەستى بۇدان بىلاي كەيىنگە قالدىرا المايمىز، - دەدى ەردوعان 19-مامىردا جاستارمەن جانە جاس سپورتشىلارمەن كەزدەسۋىندە.
ول جوبا بويىنشا جۇمىستاردىڭ باستالىپ كەتكەنىن حابارلادى. ونىڭ ايتۋىنشا، نەگىزگى زاڭدى قالىپتاستىرۋعا وسكەلەڭ ۇرپاقتىڭ قاتىسۋىنا ەرەكشە كوڭىل بولىنەتىن بولادى. ەردوعان بۇل جاستار جاڭا قۇندىلىقتاردىڭ باستى تاسىمالداۋشىسى جانە تۇركيانىڭ تۇراقتى بولاشاعىنىڭ كەپىلى بولاتىنىنا سەنىمدى.
بۇل تۇركيادا جاڭا كونستيتۋتسيانى قابىلداۋ تۋرالى ۇندەۋلەردىڭ ءبىرىنشى رەت شىعۋى ەمەس. الايدا بۇل جولى پرەزيدەنت بيلىكتىڭ بۇل پروتسەستى كۇشەيتىپ، ناقتى ناتيجەلەرگە قول جەتكىزۋگە نيەتتى ەكەنىن اشىق ايتتى.
پرەزيدەنتتىڭ جاقتاستارى جاڭا كونستيتۋتسيا ەلدەگى وزگەرىستەرگە ساي، دەموكراتيالىق ستاندارتتار مەن مەملەكەتتىڭ قازىرگى نەگىزگى زاڭىنداعى «اسكەري توڭكەرىس كەزەڭىنىڭ» ءىزىن جويۋ ءۇشىن قاجەت دەپ سانايدى.
سونىمەن قاتار، كەي ساراپشىلار تۇركيا پرەزيدەنتىنىڭ جاڭا كونستيتۋتسيانى قابىلداۋ جونىندەگى قازىرگى باستاماسى ەلدىڭ نەگىزگى زاڭىن جاڭارتۋ نيەتىمەن عانا ەمەس، ساياسي ەسەپتەرمەن دە بايلانىستى بولۋى مۇمكىن دەپ ەسەپتەيدى. اتاپ ايتقاندا، ولار قازىرگى كونستيتۋتسيادا پرەزيدەنت مەرزىمىنىڭ سانىن ەكىگە دەيىن شەكتەيتىنىن جانە تۇركيا 2018-جىلى پرەزيدەنتتىك باسقارۋ فورماسىنا وتكەننەن بەرى ەردوعان بۇل قىزمەتتى ەكىنشى رەت اتقارىپ وتىرعانىن اتاپ ءوتتى.
قولدانىستاعى ەرەجەلەرگە سايكەس، پارلامەنت مەرزىمىنەن بۇرىن سايلاۋدى تاعايىندامايىنشا، ونىڭ قايتا سايلاۋعا تۇسۋىنە رۇقسات ەتىلمەيدى. بۇل تۇرعىدا جاڭا كونستيتۋتسيانى تالقىلاۋ باسقا ەلدەردەگى پرەتسەدەنتتەرگە ۇقساس تەرميندەردى «نولدەن شىعارۋ» ءۇشىن قۇقىقتىق نەگىز جاساپ، ەردوعانعا رەسمي تۇردە سايلاۋعا قاتىسۋعا مۇمكىندىك بەرە الادى.
ال، تۇركيانىڭ ادىلەت جانە دامۋ پارتياسى 2027-جىلدىڭ كۇزىندە كەزەكتەن تىس پرەزيدەنتتىك سايلاۋ وتكىزۋ مۇمكىندىگىن جوققا شىعارمايدى.
بۇعان دەيىن تۇركيا پرەزيدەنتى رەجەپ تايىپ ەردوعان الداعى پرەزيدەنتتىك سايلاۋعا قاتىسۋى مۇمكىن ەكەنىن مەڭزەگەن.
