رەداكسيا القاسى قازاقستان تاريحى جونىندەگى اكادەميالىق باسىلىمنىڭ ءبىرىنشى تومىن قارادى
اقتوبە. KAZINFORM - بۇگىن مەملەكەتتىك كەڭەسشى ەرلان قاريننىڭ توراعالىعىمەن «قازاقستان تاريحى: ەجەلگى داۋىردەن بۇگىنگە دەيىن» اتتى اكادەميالىق 7 تومدىقتى دايىنداۋ جونىندەگى رەداكسيا القاسىنىڭ العاشقى وتىرىسى ءوتتى.
بۇل تۋرالى اقوردانىڭ باسپا ءسوز قىزمەتى حابارلادى.
رەداكسيا القاسىنىڭ الدىندا تۇرعان باستى مىندەت – كوپتومدىقتىڭ ءماتىن ماتەريالدارىن، كارتالارى مەن يلليۋستراتسيالارىن تۇپكىلىكتى ساراپتاۋ جانە بەكىتۋ، سونداي-اق ونى بەتتەۋگە، باسپاعا دايىنداۋ.
باسقوسۋدا باسىلىمنىڭ كونە داۋىرگە ارنالعان ءبىرىنشى تومى قاراستىرىلدى.
القا مۇشەلەرى اكادەميالىق باسىلىمنىڭ ءبىرىنشى تومىنىڭ جەتەكشىسى، ءا. ح. مارعۇلان اتىنداعى ارحەولوگيا ينستيتۋتىنىڭ باس ديرەكتورى اقان وڭعار ۇلىنىڭ بايانداماسىن تىڭداپ، ۇسىنىلعان ماتەريالدىڭ تۇجىرىمداماسىن، مازمۇنى مەن قۇرىلىمىن تالقىلادى. جيىندا رەتسەنزەنتشىلەر ۇلتتىق عىلىم اكادەمياسىنىڭ اكادەميگى، تاريح عىلىمدارىنىڭ دوكتورى جاكەن تايماعامبەتوۆتىڭ، تاريح عىلىمدارىنىڭ كانديداتى، تورايعىروۆ ۋنيۆەرسيتەتىنە قاراستى ءا. ح. مارعۇلان اتىنداعى ارحەولوگيالىق عىلىمي-زەرتتەۋ ورتالىعىنىڭ ديرەكتورى ۆيكتور مەرتستىڭ، ش. ش. ۋاليحانوۆ اتىنداعى تاريح جانە ەتنولوگيا ينستيتۋتىنىڭ اعا عىلىمي قىزمەتكەرى نۇرسان ءالىمبايدىڭ ساراپشىلىق پىكىرلەرى تىڭدالدى. سونداي-اق رەداكسيا القاسىنىڭ باسقا دا مۇشەلەرىنىڭ وي-پىكىرلەرى ورتاعا سالىندى.
رەداكسيا القاسىنىڭ كەلەسى وتىرىسى تامىز ايىندا وتەدى. وندا «قازاقستان تاريحى: ەجەلگى داۋىردەن بۇگىنگە دەيىن» اتتى اكادەميالىق باسىلىمنىڭ ەكىنشى تومى تالقىلانادى.
ايتا كەتەلىك كەشە ەرلان قارين ەتنوسارالىق كەلىسىم ماسەلەلەرىنە ارنالعان رەسپۋبليكالىق جيىن وتكىزگەن ەدى.
