ەربولات دوسايەۆقا شاعىم ايتقان الماتىلىق ايەل تالىپ قالدى

الماتى. KAZINFORM - ەربولات دوسايەۆتىڭ اۋەزوۆ اۋدانى تۇرعىندارمەن كەزدەسۋىندە ماسەلەسىن ايتپاق بولعان ايەل جىلاپ، قوبالجىپ، ەسىنەن تانىپ قالدى.

الماتى تۇرعىنى قالا اكىمىنە ونى وتباسىمەن بىرگە تۇرىپ جاتقان ۇيىنەن قۋىپ جاتقانىن ايتىپ شاعىمداندى.

«رەكەتتىك جولمەن، جالعىز باسپانامىزدى تارتىپ الىپ جاتىر. كوشەدە قالدىق. سەبەبى ەشقايسىسى ادىلدىكتى كورگىسى كەلمەيدى. بىلتىر 1-ناۋرىزدا ءورت شىعىپ ءۇيىمىز ورتەنىپ كەتتى. ءورت كەزىندە كورشى عيمارات زارداپ شەكتى. مىنە، بارلىق تەحنيكالىق زاڭبۇزۋشىلىقپەن سالىنعان ەكى قاباتتى جاتاقحانانىڭ زاڭسىزدىعىن راستايتىن قۇجاتتار بار. تومەندە 5 بولمە، جوعارىدا 5 بولمە، بارلىق جەردە گاز بار، 10 گاز نۇكتەسى بار. نەگىزى ەكى گاز نۇكتەسىنەن ارتىق سالۋ رۇقسات ەتىلمەيدى. مەنشىك يەسى سوتقا جۇگىندى، سۋديا تەحنيكالىق بۇزۋشىلىقتار ءۇشىن ءبىزدىڭ ءوتىنىشىمىزدى قابىلدامايدى. جاتاقحانا ءبىزدىڭ قورشاۋدان 76 س م قاشىقتا ورنالاسقان. بولمەلەرىن سۋ باسىپ كەتپەسىن دەپ، توبەسىن ءبىزدىڭ ۇيگە قوستى. ءورت كەزىندە بىرگە ورتەندى، ەندى ول 32 ميلليون شىعىندى وتەۋدى تالاپ ەتىپ وتىر. بۇل بەس بولمە ەمەس، بۇكىل ءۇيدىڭ قۇنى»، - دەيدى ايەل.

ايتۋىنشا، مەنشىك يەسى عيماراتىن ەش جەردە تىركەمەگەن. سونىمەن قاتار ول قولىندا ءبىر عانا قۇجاتتىڭ، قۇرىلىسقا ەش قاتىسى جوق ورگانداردىڭ قولدارى قويىلعان قابىلداۋ-تاپسىرۋ اكتىسى بار ەكەنىن جەتكىزدى.

ەربولات دوسايەۆ قالا قۇرىلىسىن باقىلاۋ باسقارماسى باسشىسىنا جاتاقحانا قۇرىلىسىنىڭ زاڭدىلىعىن تەكسەرۋدى، توتەنشە جاعدايلار دەپارتامەنتىنىڭ باسشىسىنا ءورتتىڭ قاي جەردە جانە نەلىكتەن شىققانىن، قۇرىلىس نورمالارى ساقتالدى ما، جوق پا، سونى انىقتاۋدى تاپسىردى.

ءوز كەزەگىندە باسقارما باسىشىسى جاتاقحانا قۇرىلىسىندا زاڭبۇزۋشىلىقتار انىقتالعانىن راستادى.

«ءبىز سىزگە كومەكتەسەمىز، سوت ءىسىن جۇرگىزۋگە نەگىز بەرەمىز. ادىلەت دەپارتامەنتىنە ءوتىنىش، بارلىق كوشىرۋ ارەكەتتەرىن توقتاتا تۇرىڭىز. ءبىز قۇدىرەتتى ەمەسپىز، ولارعا نەمەسە باسقالارعا تاپسىرما بەرە المايمىن. ماعان باعىنبايتىن بولىمدەر مەن ورگاندار بار. مەن ولاردان تەك سۇراي الامىن»، - دەدى ەربولات دوسايەۆ.

اۆتور

الما مۇقانوۆا