ەربول قاراشوكەيەۆ جەر سىلكىنىسىنە بايلانىستى جەدەل شتاب وتىرىسىن وتكىزدى
تاراز. KAZINFORM - جامبىل وبلىسىنىڭ اكىمى ەربول قاراشوكەيەۆ جەر سىلكىنىسى ورىن العان مەركى جانە ت. رىسقۇلوۆ اۋداندارىنداعى تابيعي اپات سالدارىن جويۋ بويىنشا جەدەل شتاب وتىرىسىن وتكىزدى. بۇل تۋرالى وبلىستىق اكىمدىكتىڭ باسپا ءسوز قىزمەتى ءمالىم ەتتى.
باسقوسۋعا ازاماتتىق قورعاۋ قىزمەتىنىڭ، جەرگىلىكتى اتقارۋشى ورگانداردىڭ، ءتيىستى ۆەدومستۆولاردىڭ باسشىلىق وكىلدەرى قاتىستى.
جيىندا مەركى جانە ت. رىسقۇلوۆ اۋداندارىنىڭ اكىمدەرى اعىمداعى جاعداي بويىنشا ەسەپ بەردى.
اۋدانداردا زارداپ شەككەن ازاماتتار تىركەلمەگەن. تىرشىلىكتى قامتاماسىز ەتۋ نىساندارى قالىپتى رەجيمدە جۇمىس ىستەۋدە.
جالپى مەركى جانە ت. رىسقۇلوۆ اۋدانىندا 14 الەۋمەتتىك نىسان ءىشىنارا زارداپ شەككەن. ونىڭ ىشىندە 9 ءبىلىم بەرۋ، 2 دەنساۋلىق ساقتاۋ، 1 الەۋمەتتىك قورعاۋ، 1 سپورت جانە 1 مادەنيەت نىسانى بار.
قوسىمشا بۇلىنگەن نىسانداردى انىقتاۋ، زەردەلەۋ جۇمىستارى جالعاسىپ جاتىر.
- مەملەكەت باسشىسى وڭىردەگى جاعدايدى جەكە باقىلاۋىندا ۇستاپ وتىر. پرەزيدەنت الەۋمەتتىك نىساندار مەن تۇرعىن ۇيلەردى قالپىنا كەلتىرۋ جانە جوندەۋ جۇمىستارىن جۇرگىزۋ ءۇشىن قاجەتتى كومەك كورسەتۋدى جۇكتەدى. پرەمەر- ءمينيستردىڭ تاپسىرماسى بويىنشا توتەنشە جاعدايلار ۆيتسە- ءمينيسترى باستاعان ۇكىمەتتىك جۇمىس توبى وبلىسقا جىبەرىلدى. الەۋمەتتىك جانە تىرشىلىكتى قامتاماسىز ەتۋ، ونەركاسىپ نىساندارىنىڭ جاي- كۇيى، جول قاتىناستارى تۇراقتى باقىلاۋدا بولۋى قاجەت. تۇرعىنداردىڭ قاۋىپسىزدىگى بارىنەن ماڭىزدى، - دەگەن ەربول قاراشوكەيەۆ شىعىن كولەمىن انىقتاۋ ءۇشىن كەشەندى شارالار قابىلداپ، تۇرعىنداردىڭ تالاپ- تىلەكتەرىن بارىنشا نازارعا الۋدى تاپسىردى.
سونىمەن بىرگە اۋدان اكىمدەرىنە اۋىلدىق ەلدى مەكەندەردەگى نىسانداردى تولىق ارالاپ، احۋالدى كوزبەن كورۋدى، تۇرعىندار اراسىندا ءتۇسىندىرۋ جۇمىستارىن كۇشەيتۋدى، قاجەتتىلىگىنە قاراي پسيحولوگيالىق كومەك كورسەتۋدى ەسكەرتتى.
وبلىس اكىمى ب ا ق پەن الەۋمەتتىك جەلىلەردە شىندىققا جاناسپايتىن جالعان اقپاراتتاردىڭ تارالىپ جاتقانىنا نازار اۋداردى. جامبىلدىقتاردى تەك رەسمي اقپارات كوزدەرىنە عانا سەنۋگە شاقىردى.
ايتا كەتەيىك، تۇرعىنداردى الاڭداتقان مەركى اۋدانىنا تەحنيكالاردىڭ كەلۋى، ۋاقىتشا شاتىرلاردىڭ ورناتىلۋى - ىقتيمال توتەنشە جاعدايلاردىڭ الدىن الۋعا باعىتتالعان الگوريتمگە سايكەس جۇرگىزىلۋدە. الاڭداۋعا نەگىز جوق. بۇل بارلىق ءتيىستى مەكەمەلەردىڭ كۇشەيتىلگەن رەجيمدە جۇمىس ىستەپ، قاۋىپسىزدىكتى قامتاماسىز ەتۋگە باعىتتالعان ساقتىق شارالارى عانا بولىپ تابىلادى.
ەسكە سالا كەتەيىك، 2025 -جىلدىڭ 28-ناۋرىز كۇنى تۇندە جامبىل وبلىسىنىڭ ءبىرقاتار اۋدانى مەن تاراز قالاسىندا جەر سىلكىنىسى تىركەلدى.
جەر استى ءدۇمپۋىنىڭ جوعارى قارقىنى - 5 بال - مەركى اۋدانىندا ورىن الدى. ت. رىسقۇلوۆ اۋدانىندا جەر سىلكىنىسىنىڭ كۇشى 4 بالدى، تاراز قالاسى مەن قالعان اۋدانداردا - 2 بالدى قۇرادى.
جەر سىلكىنىسى 15:56-دا قايتا سەزىلدى.
وبلىس اكىمىنىڭ تاپسىرماسىنا سايكەس جەدەل شتاب جۇمىس ىستەپ جاتىر.
ەسكە سالا كەتەيىك، بۇعان دەيىن الماتىدان 323 شاقىرىم جەردە جەر سىلكىنىسى تىركەلگەنىن جازعان بولاتىنبىز. ەسەپتەلگەن قارقىندىلىعى مەركى اۋىلىندا - 5.0 بال، قۇلان اۋىلىندا - 4.0 بال، شۋ قالاسىندا - 2.0 بال شاماسىندا بولعان.
ارتىنشا تۇرار رىسقۇلوۆ اۋدانى قاراقىستاق اۋىلىنداعى مادەنيەت ءۇيى، مەركى اۋداندىق اۋرۋحاناسى، ويتال اۋىلىنداعى مەكتەپ عيماراتىنىڭ قابىرعاسىندا جارىقشاق پايدا بولعانى انىقتالعان ەدى. وسىعان وراي وڭىردە جەدەل شتاب جۇمىسىن باستادى.
ارنايى كوميسسيا شىعىندى انىقتاۋ جۇمىستارىن جۇرگىزەتىنى بەلگىلى بولدى.
كوپ ۇزاماي جامبىل وبلىسىندا تاعى دا جەر سىلكىنگەن بولاتىن.
ت ج م جامبىل وبلىسىنداعى جەر سىلكىنىسىنىڭ قۋاتىنا بايلانىستى مالىمەتتى جاريالادى.
ۇكىمەتتىك جۇمىس توبى جاعدايدى ساراپتاپ، باعالاۋ جانە شارا قولدانۋ ءۇشىن جامبىل وبلىسىنا جىبەرىلدى.
پرەزيدەنتكە جامبىل وبلىسىنداعى جەر سىلكىنىسىنەن كەيىنگى احۋال باياندالدى.
