ەربول مىرزابوسىنوۆ ساداق اتۋدان ۇلتتىق قۇراما سپورتشىلارىن ماراپاتتادى
استانا. KAZINFORM — تۋريزم جانە سپورت ءمينيسترى ەربول مىرزابوسىنوۆ ساداق اتۋدان سينگاپۋردە وتكەن ازيا كۋبوگىنىڭ ەكىنشى كەزەڭىندە جوعارى ناتيجە كورسەتكەن سپورتشىلارمەن جانە باس باپكەرمەن كەزدەستى.
مينيستر سپورتشىلاردىڭ سارى قۇرلىق باسەكەسىندە ەل نامىسىن ابىرويمەن قورعاپ، حالىقارالىق ارەنادا لايىقتى ونەر كورسەتكەنىن اتاپ ءوتىپ، بۇل - وتاندىق ساداق اتۋ سپورتىنداعى تاريحي جەتىستىك ەكەنىن ايتتى.
- سىزدەردىڭ جارقىن جەتىستىكتەرىڭىزدىڭ جانە مەملەكەتتىڭ جان- جاقتى قولداۋىنىڭ ناتيجەسىندە ەلىمىزدە ساداق اتۋ سپورتىنا دەگەن قىزىعۋشىلىق ارتىپ كەلەدى. قازىرگى تاڭدا ەلىمىزدە بۇل سپورت تۇرىمەن 7000 عا جۋىق ادام اينالىسادى. ازيا كۋبوگىندەگى ناتيجە - قازاقستان سپورتىنداعى تاريحي جەتىستىك. ساداقشىلارىمىز بۇرىن-سوڭدى مۇنداي جەتىستىككە قول جەتكىزگەن ەمەس. بۇل - سپورتشىلار مەن جاتتىقتىرۋشىلاردىڭ بىرلەسكەن ەڭبەگىنىڭ جەمىسى. ازيا كۋبوگىندەگى زور تابىس ساداق اتۋ سپورتىنىڭ تانىمالدىلىعىن ودان ءارى ارتتىرا تۇسەدى دەپ ويلايمىن، - دەدى ەربول مىرزابوسىنوۆ.
تۋريزم جانە سپورت ءمينيسترى قۇرلىقتىق جارىستا ۇزدىك ناتيجە كورسەتكەن ادەل جەكسەنبينوۆا، ۆيكتوريا ليان، دىلمۇحامەت مۇسا، بۋنەد ميرزامەتوۆ، اندرەي تيۋتيۋن جانە روكسانا يۋنۋسوۆانى قۇرمەت گراموتاسىمەن ماراپاتتادى. ال ۇلتتىق قۇرامانىڭ باس جاتتىقتىرۋشىسى باۋىرجان جولدىبايەۆقا العىس حات تابىستادى.
ايتا كەتەيىك، 15-20-ماۋسىم كۇندەرى سينگاپۋردە وتكەن ازيا كۋبوگىنىڭ ەكىنشى كەزەڭىندە قازاقستان قۇراماسى ەرلەر اراسىنداعى كوماندالىق جانە ارالاس كوماندالىق سىندا التىن جۇلدە يەلەندى. ال ايەلدەر اراسىنداعى كوماندالىق جارىستا جەرلەستەرىمىز قولا جۇلدەگە قول جەتكىزدى.
