گۋربانگۋلى بەردىمۇحامەدوۆ ش ى ۇ سامميتىنە قاتىسۋ ءۇشىن استاناعا كەلدى

استانا. KAZINFORM - تۇرىكمەنستان حالك ماسلاحاتىنىڭ ءتوراعاسى گۋربانگۋلى بەردىمۇحامەدوۆ قازاقستان استاناسىنا كەلدى. اۋەجايدا تۇرىكمەن حالقىنىڭ ۇلتتىق كوشباسشىسىن قازاقستان پرەمەر-ءمينيسترى ولجاس بەكتەنوۆ قارسى الدى.

گۋربانگۋلى بەردىمۇحامەدوۆ العاش رەت وتكىزىلىپ وتىرعان «ش ى ۇ پليۋس» فورماتىنداعى كەزدەسۋگە قاتىسادى، ول «كوپجاقتى ديالوگتى نىعايتۋ - ورنىقتى بەيبىتشىلىك پەن دامۋعا ۇمتىلۋ» ۇرانىمەن وتەدى. وتىرىسقا بايقاۋشى مەملەكەتتەردىڭ باسشىلارى، قۇرمەتتى قوناقتار جانە حالىقارالىق ۇيىمداردىڭ وكىلدەرى قاتىسادى.

قازاقستان مەن تۇرىكمەنستان اراسىنداعى ديپلوماتيالىق قاتىناستار دوستىق پەن ستراتەگيالىق ارىپتەستىك نەگىزىندە دامۋدا. ترانزيتتىك- كولىك سالاسىندا بىرلەسكەن ءوزارا ءتيىمدى جوبالار بار، گاز سالاسىنداعى ىنتىماقتاستىقتى دامىتۋ بويىنشا قادامدار بەلگىلەنگەن.

وتكەن جىلدىڭ قورىتىندىسى بويىنشا قازاقستان مەن تۇرىكمەنستان اراسىنداعى ءوزارا ساۋدا كولەمى $563 ميلليون قۇرادى، وسىلايشا 2022 -جىلمەن سالىستىرعاندا %28 عا ۇلعايدى. بيىل دا وڭ ءۇردىس ساقتالدى: 4 ايدا ءوزارا ساۋدا كولەمى ءوسىپ، $167,8 ميلليونعا جەتتى.

اۆتور

ابىلايحان جۇماشەۆ