راقىمجان قوشقاربايەۆ رەيحستاگقا 7 ساعات بويى ەڭبەكتەپ جەتكەن

استانا. قازاقپارات - وسىدان 80 جىل بۇرىن 30-ساۋىردە راقىمجان قوشقاربايەۆ جاۋىنگەر گريگوري بۋلاتوۆپەن بىرگە رەيحستاگقا كەڭەس وداعىنىڭ تۋىن تىككەن بولاتىن. ول وسى ارقىلى سۇراپىل سوعىسقا نۇكتە قويدى. قاندى قىرعىن شەبىندەگى قازاق باتىرىنىڭ ەرلىگى عاسىرعا جۋىقتاسا دا، ەل ەسىندە ماڭگى ساقتالماق. جەڭىس كۇنى قارساڭىندا بىزدە جاۋىنگەرىمىزدىڭ ونەگەلى ءومىر جولىن ەسكە تۇسىردىك.

سۇراپىل سۇم سوعىستىڭ اياقتالۋىنا بىرنەشە كۇن قالعاندا تاريحتى تۇبەگەيلى وزگەرتكەن راقىمجان قوشقاربايەۆ پەن گريگوريي بۋلاتوۆ ەدى. وسىدان تۋرا 80 جىل بۇرىن قارشا جاۋعان وت پەن وقتىڭ ورتاسىنان ءوتىپ، جاۋ ورداسىنا قوس جاۋىنگەر 7 ساعات بويى ەڭبەكتەپ جەتەدى.

راحىمجان قوشقاربايەۆ مايدان دالاسىنا 1944 -جىلدىڭ قازان ايىندا اتتانادى. 150- اتقىشتار ديۆيزياسىندا ۆزۆود كومانديرى بولىپ، بەلارۋس، پولشا ۇرىستارىندا ەرلىك كورسەتەدى. 1945 -جىلى بەرلين تۇبىندەگى شايقاسقا بارادى. كەيىن ونى باتالون كومانديرى رەيحستاگقا تۋ تىگۋگە اتتاناتىن توپتى باسقارۋدى تاپسىرادى. بۇل ولىممەن پارا-پار جاۋاپكەرشىلىك ەدى. ونى دا قازاقتىڭ باتىر ۇلى ابىرويمەن اتقارىپ شىعادى.

قانات ەڭسەنوۆ، تاريح عىلىمدارىنىڭ كانديداتى:

- قاسىندا گريگوري بۋلاتوۆ دەگەن جىگىت بولادى. ەكەۋىنىڭ ءبىرىنشى بولىپ تۋ تىككەنى راس ەكەن. كەيىنگى دەرەكتەرگە قاراعاندا تۇسكى ساعات 14:30-دا رەيحستاگ توبەسىنە تۋ تىككەن. قوشقاربايەۆتىڭ ەرلىگى اقىرى مويىندالدى. تەك اراعا الپىس جىلدان استام ۋاقىت سالىپ. وكىنىشتىسى، باتىردىڭ كوزى تىرىسىندە ك س ر و تاراپىنان وعان لايىقتى قۇرمەتتىڭ كورسەتىلمەۋى عانا. تاريح بەتتەرىندە باسقا ادامداردىڭ ەسىمى جازىلدى.

2007 -جىلدىڭ 7- مامىرىندا رەسەيدىڭ اسكەري تاريح ينستيتۋتى رەيحستاگقا تۋ تىككەن 150- اتقىشتار ديۆيزياسىنىڭ لەيتەنانتى راقىمجان قوشقاربايەۆ ەكەنىن مويىندادى.

ەركىن ءابىل، ق ر پارلامەنتى ءماجىلىسىنىڭ دەپۋتاتى:

- قوشقاربايەۆتىڭ سول كەزدەگى ەرلىگى كەڭەس اسكەرىن جىگەرلەندىرىپ، رۋحىن وياتتى. راحىمجان ءولىم مەن ءومىر اراسىندا ءجۇرىپ، تايسالماستان جەڭىس تۋىنا ۇمتىلدى. وسى ەرلىگى ءۇشىن لەيتەنانت راقىمجان قوشقاربايەۆ پەن جاۋىنگەر گريگوري بۋلاتوۆ كەڭەس وداعىنىڭ باتىرى اتاعىنا ۇسىنىلدى. ءبىراق ول تەك قىزىل جۇلدىز وردەنىمەن ماراپاتتالعان ەدى.

راقىمجان قوشقاربايەۆ 1924 -جىلى 19-قازاندا اقمولا وبلىسىنىڭ تايتوبە اۋىلى ماڭىنداعى قىستاقتا دۇنيەگە كەلگەن. وعان انانىڭ مەيىرىمى مەن جىلى الاقانىن، اكەنىڭ قامقورلىعىن سەزىنۋ بۇيىرمادى. 4 جاسىندا اناسى دۇنيەدەن ءوتتى، ال اكەسى بولسا جالعان ساياسي جالامەن سوتتالىپ كەتتى. حالىق جاۋىنىڭ ۇلى دەپ قاراعاندارى دا بولدى. قارشاداي ۇل تاعدىردىڭ بۇل سىناعىنا سىنبادى. اسكەري بورىشىن وتەپ، مايدان دالاسىنا بەت الدى. ەرلىگىمەن ەل ەسىندە قالىپ، حالىق جاۋىنىڭ ۇلىنان حالىق قاھارمانى اتاعىن يەلەندى.

24.kz