راحات تۇرلىحانوۆقا قاتىستى اپەللياتسيالىق سوت جابىق رەجيمدە ءوتىپ جاتىر

راحات تۇرلىحانوۆقا قاتىستى اپەللياتسيالىق سوت جابىق رەجيمدە ءوتىپ جاتىر
فوتو: Kazinform

الماتى. KAZINFORM - ايەلىنە قول كوتەرگەن راحات تۇرلىحانوۆقا قاتىستى اپەللياتسيالىق سوت جابىق رەجيمدە ءوتىپ جاتىر.

ايىپتالۋشى مەن جابىرلەنۋشى سۋديادان سوت وتىرىسىنا قاتىسۋعا كەلگەن بۇقارالىق اقپارات قۇرالدارىنىڭ وكىلدەرىن شىعارىپ جىبەرۋدى سۇرادى.

«قۇرمەتتى سوت. مەن سوت وتىرىسىنا جۋرناليستەردىڭ قاتىستىسۋىنا قارسىمىن. ەگەر مۇمكىندىك بولسا، ولاردى شىعارىپ جىبەرۋىڭىزدى سۇرايمىن»، - دەدى راحات تۇرلىحانوۆ.

پروكۋرور مەن ەكس-ءانشىنىڭ قورعاۋشىسى دا ەرلى-زايىپتىلاردىن ءوتىنىشىن قۇپتادى.

سۋديا قانات مولداشەۆ راحات تۇرلىحانوۆتىڭ ءىسىن جابىق رەجيمدە قاراۋ تۋرالى شەشىم قابىلدادى.

بۇعان دەيىن الماتى قالاسىنىڭ اكىمشىلىك قۇقىق بۇزۋشىلىق ىستەرى جونىندەگى مامانداندىرىلعان اۋدانارالىق سوتى تاراپتاردىڭ تاتۋلاسۋىنا بايلانىستى تۇرلىحانوۆقا ەسكەرتۋ عانا جاساعان. الايدا پروكۋراتۋرا سوتقا نارازىلىق ءبىلدىرىپ، اپەللياتسيالىق شاعىم ءتۇسىردى.

ەسكە سالايىق، وتكەن جىلدىڭ جەلتوقسان ايىندا راحات تۇرلىحانوۆ ۇيىندە جانجال شىعارىپ، ايەلىن سوققىعا جىققان. سوت وتىرىسىندا ول ءوز كىناسىن مويىنداپ، ىستەگەن ىسىنە وكىنىتىنىن جەتىكىزدى. سونداي- اق، تاتۋلاسقاندارىن ايتىپ، سوتتان ءىستى توقتاتۋدى سۇراعان ەدى.

كەيىن راحات تۇرلىحانوۆ پەن ونىڭ ايەلى ۆيدەوجازبا جاريالادى.

«بىزدە ءبارى جاقسى. راحات، قامقور، مەيىرىمدى جار ءارى اكە. ءيا، وتباسىندا ۇرىس-كەرىس، تۇسىنىسپەۋشىلىك بولدى. ءبىراق مەن بۇقارالىق اقپارات قۇرالدارىندا جاعدايدى بىلمەي جاتىپ، راحاتتى ادىلەتسىز تۇردە جامان جاعىنان كورسەتىپ جاتقانىنا قىنجىلام»، - دەدى راحات تۇرلىحانوۆتىڭ ايەلى التىناي.

سوڭعى جاڭالىقتار