قىزىڭىز بىرەۋدى قاعىپ ءولتىردى: الاياقتار كۋرەر ارقىلى اقشا الدىراتىن بولعان

استانا. KAZINFORM - سوڭعى ۋاقىتتا تەلەفون الاياقتارى ەلدىڭ اقشاسىن الداپ الۋ ءۇشىن كۋرەرلەردى پايدالاناتىن جاعدايلار جيىلەپ كەتتى.

تەلەفون الاياقتارى ءارتۇرلى سايتتارعا كۋرەرلىك جۇمىس ۇسىنىپ، بەلگىلى ءبىر اقىعا قىلمىستىق جولمەن الىنعان قاراجاتتى اۋدارۋ تۋرالى جارنامالاردى جاريالاپ وتىرعان.

استانادا تەلەفون الاياعى جابىرلەنۋشىگە حابارلاسقان. وعان قىزىنىڭ ادام ولىمىنە الىپ كەلگەن جول اپاتىن جاساعانىن جانە ءىستى وڭ شەشۋ ءۇشىن وزىنە اقشا اۋدارۋ قاجەت ەكەنىن ايتقان.

وسىنداي سحەما بويىنشا 1 ميلليون تەڭگەدەن استام قاراجاتتى يەمدەنىپ، 2 جابىرلەنۋشىنى الداعان.

كۋرەر رەتىندە ەلوردانىڭ 27 جاستاعى تۇرعىنى جۇمىستى Telegram-ارناسى ارقىلى حابارلاندىرۋدان تاۋىپ، قىلمىستىق توپتىڭ سىبايلاسى بولعان.

كىنالى اقشانى الىپ، وزىنە وسى اقشانىڭ %10 قالدىرىپ، قالعان سومانى بەيمالىم ادامداردىڭ شوتىنا جىبەرىپ وتىرعان.

سوت ۇكىمىمەن سوتتالۋشى جابىرلەنۋشىلەردىڭ پايداسىنا ماتەريالدىق شىعىندى ءوندىردى.

ۇكىم زاڭدى كۇشىنە ەندى.

قىلمىستىق توپتىڭ سىبايلاستارىن قىلمىستىق جاۋاپكەرشىلىككە تارتۋ بويىنشا بارلىق شارالار قابىلدانىپ جاتىر.