قىزىلوردادا تۇزەۋ مەكەمەسىندەگى 26 سوتتالعان ازامات وتباسىن قۇرعان

استانا. KAZINFORM - قىزىلوردا وبلىسى بويىنشا قاج دەپارتامەنتىنىڭ تۇزەۋ مەكەمەلەرىندە 1000-عا جۋىق سوتتالعان ازامات جازاسىن وتەپ جاتىر. باس بوستاندىعىنان ايىرىلعاندار اراسىندا وتباسىن قۇرعاندار دا كەزدەسەدى. اتاپ ايتقاندا، 2024 -جىلدىڭ 6 ايىندا 26 سوتتالۋشى شاڭىراق كوتەرگەن.

جۋىردا تاعى ءبىر جازاسىن وتەۋشى ۇيلەندى. ول قاراقشىلىق جانە كىسى ءولتىرۋ بابىمەن 20 جىلعا سوتتالعان.

- بۇگىن مەن ءۇشىن قۋانىشتى كۇن. وتباسىلى بولىپ جاتىرمىن. ءىستى بولماي تۇرىپ، ومىرلىك سەرىگىممەن دوستىق قارىم-قاتىناس ورناتقانمىن. بولاشاققا جوسپارىم كوپ ەدى. بىزگە مەكەمەدە ءتۇرلى پسيحولوگيالىق ترەنينگتەر وتكىزەدى. وسى ترەنينگتەرگە قالماي قاتىسامىن. جۇمىسىم دا بار. مەكەمەنىڭ ءوندىرىس ايماعىنداعى كىرپىش سەحىندا ەڭبەك ەتىپ ءجۇرمىن. جالاقىمدى ەندى وتباسىما جىبەرەمىن، - دەيدى ول.

№37 مەكەمەسىنىڭ زاڭگەرى جالعاس ەسماحانوۆتىڭ ايتۋىنشا، تۇزەۋ مەكەمەلەرىندە جازاسىن وتەۋشىلەر نەكەگە تۇرۋ ءۇشىن زاڭگەرلەردەن كەڭەس الىپ، ءوتىنىش جازادى. ودان سوڭ ا ح ا ت ماماندارى جازعان وتىنىشتەرى نەگىزىندە، ولاردىڭ نەكەسىن قيىپ، نەكە كۋالىكتەرىن تابىستايدى.

- باس بوستاندىعىنان ايىرۋ ورىنداردا نەكە قيۋ سوتتالعاندارعا وڭ اسەر ەتەدى. سوتتالعان وتباسىلى بولعان سوڭ، مەرزىمىنەن بۇرىن بوساتىلىپ شىعۋى ءۇشىن ءتارتىبىن دۇرىستاپ، ومىرگە دەگەن كوزقاراسى وزگەرەدى. سونداي-اق قوعامدا ءوز ورنىن تابۋعا جانە تۇزەۋ مەكەمەسىنەن شىققان سوڭ وتباسى الدىنداعى جاۋاپكەرشىلىكتى سەزىنەدى. ءوتىنىش بەرگەن جازاسىن وتەۋشىلەر اراسىندا بىرگە تۇرىپ، كەزدەسەدى، - دەيدى جالعاس ەسماحانوۆ.

اۆتور

ابىلايحان جۇماشيەۆ