قىزىلوردادا ساتبايەۆ قالاسىنىڭ بۇرىنعى پروكۋرورى سوتتالدى

قىزىلوردا. KAZINFORM - قىزىلوردا قالاسىنىڭ  2-سوتى ۇلىتاۋ وبلىسى ساتبايەۆ قالاسىنىڭ بۇرىنعى پروكۋرورىنا قاتىستى سوت پروتسەسىن اياقتادى.

وبلىستىق سوتتىڭ باسپا ءسوز قىزمەتى حابارلاعانداي، سوتتا ق ر ق ك- ءنىڭ 190-بابى 3-بولىگىنىڭ 2-تارماعىمەن، 28-بابىنىڭ 4-بولىگىمەن، 367-بابىنىڭ 2-بولىگىمەن سوتتالۋشىعا قاتىستى قىلمىستىق ءىس قارالدى.

- سوتتالۋشى بيىل 1-ءساۋىر كۇنى قىزىلوردا قالاسىندا تانىسى ت. -نى كەزدەستىرىپ، اڭگىمە بارىسىندا وعان قاتىستى بۇزاقىلىق دەرەگى بويىنشا قىلمىستىق ءىستىڭ تەرگەلىپ جاتقانىن بىلگەن. قىزمەت بابىن پايدالانىپ، ونى الداۋ جانە سەنىمدى تەرىس پايدالانۋ جولىمەن اقشالاي سىياقىعا قىلمىستىق ءىستى وڭتايلى شەشىپ بەرۋگە كومەك بەرە الاتىنىن ايتىپ، پروتسەسسۋالدىق شەشىم قابىلدايتىن لاۋازىمدى ادامعا ايتارلىقتاي مولشەردە پارا بەرۋگە ازعىرىپ، ونى قىلمىستىق قۇقىقبۇزۋشىلىق جاساۋعا كوندىرگەن. سوتتالۋشى 2-ساۋىردە قىزىلوردا قالاسىنداعى جەلتوقسان كوشەسىنىڭ بويىندا ت. -مەن كەزدەسىپ، تانىستارى ارقىلى قىلمىستىق ءىس بويىنشا وڭ ناتيجەلى شەشىم قابىلداۋعا ىقپال ەتە الاتىنىن جالعان ايتىپ، قىزمەت بابىن پايدالانۋ ارقىلى 2 ميلليون تەڭگە سۇراعان. ونىڭ 1 ميلليون تەڭگەسىن تانىسىنىڭ ابونەنتتىك نومىرىنە تىركەلگەن «Kaspi bank» ەسەپشوتىنا اۋدارتقان. ودان كەيىن سوتتالۋشى 24-ءساۋىر كۇنى ت. -مەن ابونەنتتىك ءنومىرى ارقىلى سويلەسىپ، وعان 500 مىڭ تەڭگەسىن تانىسىنىڭ ابونەنتتىك نومىرىنە تىركەلگەن «Kaspi bank» ەسەپشوتىنا اۋدارتىپ الىپ، الداۋ جولىمەن بوتەننىڭ مۇلكىن جىمقىرعان. سوتتا سوتتالۋشى ءوز كىناسىن مويىندادى، - دەلىنگەن حابارلامادا.

سوت ۇكىمىمەن پروكۋراتۋرانىڭ بۇرىنعى وكىلى كىنالى دەپ تانىلىپ، ق ك- ءنىڭ 190-بابى 3- بولىگىنىڭ 2-تارماعىمەن 3 جىل مەرزىمگە باس بوستاندىعىنان ايىرۋ جازاسىنا، ال ق ك- ءنىڭ 28-بابىنىڭ 4-بولىگى، 367-بابىنىڭ 2-بولىگىمەن 3 جىل 6 اي مەرزىمگە باس بوستاندىعىن ايىرۋ جازاسىنا، ق ك- ءنىڭ 58-بابىنىڭ 3-بولىگىنىڭ تالابىمەن ونشا قاتاڭ ەمەس جازانى نەعۇرلىم قاتاڭ جازاعا سىڭىرۋ ارقىلى تۇپكىلىكتى 3 جىل 6 اي مەرزىمگە باس بوستاندىعىنان ايىرۋ جازاسى تاعايىندالدى. سونىمەن قاتار مەملەكەتتىك قىزمەتتە، سۋديا قىزمەتىن، جەرگىلىكتى ءوزىن-ءوزى باسقارۋ ورگاندارىندا، قر ۇلتتىق بانكىندە جانە ونىڭ ۆەدومستۆولارىندا، قارجى نارىعى مەن قارجى ۇيىمدارىن رەتتەۋ، باقىلاۋ جانە قاداعالاۋ جونىندەگى ۋاكىلەتتى ورگاندا، مەملەكەتتىك ۇيىمداردا جانە كۆازيمەملەكەتتىك سەكتور سۋبەكتىلەرىندە ءومىر بويى لاۋازىمدى قىزمەت اتقارا المايدى.

قىزىلوردا وبلىستىق سوتىنىڭ قىلمىستىق ىستەر جونىندەگى سوت القاسىندا اپەللياتسيالىق شاعىمى قارالىپ، ءبىرىنشى ساتى سوتىنىڭ ۇكىمى كۇشىندە قالدىرىلدى.

بۇعان دەيىن حابارلاعانىمىزداي، ب ق و- دا 1,5 ميلليون تەڭگە پارا العانى ءۇشىن ساۋلەت جانە قالا قۇرىلىسى ءبولىمىنىڭ باسشىسى سوتتالدى.