قىزىلوردادا كولىك جىلدامدىعىن باقىلايتىن «كوزگە كورىنبەيتىن» كامەرالار پايدا بولدى

قىزىلوردا. KAZINFORM - قىزىلوردادا جىلدامدىقتى باقىلاۋعا ارنالعان «كوزگە كورىنبەيتىن» كامەرالاردىڭ پايدا بولعانى تۋرالى اقپاراتتى وبلىستىق پوليتسيا دەپارتامەنتى راستادى.

Қызылордада көлік жылдамдығын бақылайтын «көзге көрінбейтін» камералар пайда болды
فوتو: قىزىلوردا وبلىستىق پوليتسيا دەپارتامەنتى

اتالعان ۆەدومستۆودان حابارلاعانداي، دەپارتامەنت يەلىگىندەگى ارنايى بەلگىلەرى جوق قىزمەتتىك اۆتوكولىكتەرگە جىلدامدىقتى اۆتوماتتى تۇردە انىقتايتىن «Ekin X- Spotter» اتتى قۇرىلعىلار ورناتىلدى.

- وبلىس ورتالىعىندا جول كولىك وقيعالارىنىڭ الدىن الۋ جانە جول جۇرىسىنە تالاپتى كۇشەيتۋ ماقساتىندا قۇقىق بۇزۋدى تىركەيتىن موبيلدى اۆتوماتتاندىرىلعان كەشەندەردى پايدالانا وتىرىپ، جاسىرىن پاترۋلدەۋ تاجىريبەسى قولدانىسقا ەنگىزىلدى. مۇنداي كەشەندەردى قولدانۋ حالىقارالىق تاجىريبەگە ساي كەلەدى. جاسىرىن پاترۋلدەۋ بىرنەشە مەملەكەتتە كەڭىنەن قولدانىلىپ، جول ۇستىندەگى قۇقىق بۇزۋدىڭ الدىن الۋ باعىتىندا ءتيىمدى قۇرال رەتىندە دالەلدەندى، - دەدى دەپارتامەنتتىڭ جەرگىلىكتى پوليتسيا قىزمەتى باسقارماسى باستىعىنىڭ ورىنباسارى، پوليتسيا پودپولكوۆنيگى مۇراتبەك ماناتوۆ.

ءتارتىپ ساقشىلارى وسى ورايدا كولىك جۇرگىزۋشىلەرىنەن جىلدامدىقتى اسىرماۋدى، تارتىپكە باعىنۋدى سۇرايدى.

بۇعان دەيىن ءبىز وڭىردە جىل باسىنان بەرى موپەدتەرگە قاتىستى 12 جول-كولىك وقيعاسى تىركەلگەنىن، ونىڭ باسىم بولىگى جول قوزعالىسى كەزىندەگى تالاپتى ساقتاماعاننان، جولدا ءجۇرۋ ەرەجەسىن بۇزعاننان ەكەنىن جازعانبىز.

سوڭعى جاڭالىقتار