قىزىلوردادا جازاسىن وتەۋشى ەر ادامدار تىگىنمەن اينالىسىپ ءجۇر

قىزىلوردا. KAZINFORM - قىزىلوردا وبلىسى بويىنشا قىلمىستىق اتقارۋ جۇيەسى دەپارتامەنتىنىڭ 37-تۇزەۋ مەكەمەسىندە جازاسىن وتەۋشىلەر تۇگەل جۇمىسپەن قامتىلعان.

ولارعا وبلىس ورتالىعىنداعى 20 دان استام كاسىپكەر جۇمىس تاۋىپ بەرگەن. مەكەمە اكىمشىلىگى جۋىردا تاعى بىرنەشە سوتتالعان ادامدى تىگىن سەحىنا جۇمىسقا ورنالاستىردى.

- تىگىنشى ايەلدەر كيىم ءپىشۋ، تىگۋمەن اينالىسادى. كوبىنەسە قىز-كەلىنشەكتەرگە ارنالعان كويلەكتەر مەن فورمالى كيىمدەر تىگەدى، - دەدى دەپارتامەنتتىڭ ىشكى كوممۋنيكاتسيا قىزمەتىنىڭ مامانى داناگۇل دوستانوۆا.

ماتا، ينە-ءجىپتى سەح باسشىلىعى جەتكىزىپ تۇرادى ەكەن. مۇندا تىگىنشى بولىپ ەڭبەك ەتۋشىلەردىڭ ءبىرى - پەريزات بۇل ءىستى اناسىنان ۇيرەنگەن.

- سوندىقتان جۇمىسقا تەز كىرىسىپ كەتتىم. جالاقى ۋاقىتىلى بەرىلەدى. ونىڭ ءبىر بولىگىنە قاجەت نارسەمدى الىپ، ارتىلعانىن وتباسىما جىبەرىپ وتىرامىن. بوستاندىقتىڭ قادىرىن كەش تۇسىنگەنىمە وكىنەمىن. وتباسىما تەزىرەك ورالعىم كەلەدى. كوپ بالالى انامىن، بالالارىمدى ساعىندىم. جاساعان قاتەلىگىمنەن ساباق الا ءبىلدىم، - دەدى ول.

اينۇر تۇزەۋ مەكەمەسىنە 2021 -جىلى تۇسكەن. تىگىن ماشيناسىمەن جۇمىس جاساۋدى وسى جاقتان ۇيرەنىپتى.

- ايەل بولعاسىن ينە-ءجىپ ۇستاي الامىن. 4 جىل ىشىندە تىگىنشىلىك ءىستىڭ قىر-سىرىن ءبىرشاما مەڭگەردىم. قازىر فۋتبولكالار تىگىپ جاتىرمىز. تاپسىرىس بار، سونى ۋاقىتىلى ورىنداۋعا تىرىسامىز. كۇنىنە 30 شاقتى كيىم تىگەمىز. جۇمىسىم وزىمە ۇنايدى. بوستاندىققا شىققاسىن وسى كاسىپتى ودان ءارى دامىتقىم كەلەدى، - دەدى كەيىپكەرىمىز.

دەپارتامەنتتىڭ  60-مەكەمەسىندە جازاسىن وتەپ جاتقان 13 ادام مەكەمەنىڭ وندىرىستىك ايماعىنداعى «ەڭبەك- قىزىلوردا» ر م ك تىگىن سەحىندا ەڭبەك ەتىپ ءجۇر. ولاردىڭ اراسىندا تىگىنشى ماماندىعىن وقىپ، ديپلوم العان ەر ادامدار دا بار. ولار تاپسىرىس نەگىزىندە ارنايى كيىمنەن باستاپ توسەك-جابدىققا دەيىن تىگەدى.

وندىرىستىك ايماقتا بۇدان باسقا ناۋبايحانا، قولونەر بۇيىمدارىن، كىرپىش، پەسكوبلوك شىعاراتىن سەح بار.

ايتا كەتەيىك، سوڭعى 5 جىلدا قىزىلوردادا سوتتالعاندار سانى %57,5 عا وسكەن.

اۆتور

نازەركە سانيازوۆا