قىزىلوردا وبلىسىندا 103 جاستاعى مايدانگەر تاڭداۋىن جاسادى
قىزىلوردا. KAZINFORM - قىزىلوردا وبلىسىندا بۇگىن رەسپۋبليكالىق رەفەرەندۋمدا 492 مىڭنان استام ادام داۋىس بەرۋ مۇمكىندىگى بار. تاڭعى ساعات 7.00-دە قىزىلوردا وڭىرىندەگى بارلىق رەفەرەندۋم ۋچاسكەلەرى اشىلىپ، ءوز جۇمىسىن باستادى. ۋچاسكەگە العاش بولىپ كەلگەن 103 جاستاعى مايدانگەر ياحيا تاسىروۆ ءوز تاڭداۋىن جاسادى.
سىرداريا اۋدانىندا تۇراتىن ەكىنشى دۇنيەجۇزىلىك سوعىسىنىڭ ارداگەرى ياحيا تاسىروۆ رەفەرەندۋم كۇنى العاشقىلاردىڭ ءبىرى رەتىندە ءوز ۋچاسكەسىندە بيۋللەتەن الىپ، داۋىس بەردى. قاريا بۇل كۇننىڭ ماڭىزدىلىعىن اتاپ ءوتىپ، كوميسسيا مۇشەلەرىنە اق باتاسىن بەردى.
- بىرلىك ءارقاشاندا ماڭىزدى. ەل ءۇشىن وزەكتى ىستەرگە ۇلەس قوسۋىمىز كەرەك. سوندىقتان ءاربىر ساياسي ناۋقان كەزىندە ءوز تاڭداۋىمدى جاسايمىن. مەملەكەتتىڭ دامۋى كەلەشەگىمىز ءۇشىن قاجەت. ۇرپاقتارىمىز امان بولسىن، - دەدى مايدانگەر.
وڭىردە 380 رەفەرەندۋم ۋچاسكەسىندە 492380 ازامات داۋىس بەرۋگە قۇقىلى. ونىڭ 126 ى قىزىلوردا قالاسىندا، 254 اۋدانداردا ورنالاسقان.
«ۋچاسكەلەردىڭ 27 سى ازاماتتاردىڭ ۋاقىتشا بولۋ ورىندارى ياعني جابىق ۋچاسكەلەر قاتارىندا. وندا تىزىمگە ەنگەن ازاماتتار تولىق داۋىس بەرىپ بولسا، داۋىس بەرۋ ۋاقىتى ەرتە اياقتالۋى مۇمكىن. ولار اسكەري بولىمدەر، ەمدەۋ-پروفيلاكتيكالىق مەكەمەلەرى، تەرگەۋ يزولياتورلارى جانە تاعى دا باسقا ورىندار. سونداي-اق ۆاحتالىق ادىسپەن جۇمىس ىستەيتىن مەكەمەلەردەگى 6 ۋچاسكەدە داۋىس بەرۋ تاڭعى 6.00-دە باستالدى»، - دەپ ءمالىم ەتتى وبلىستىق سايلاۋ كوميسسياسىنان.
بارلىق ۋچاسكەلەر مۇگەدەكتىگى بار ازاماتتار ءۇشىن قولايلى ياعني 1-قاباتتا ورنالاسقان. ال برايل قارپىن قولدانا الاتىن 72 ۋچاسكەدە 100 كوز مۇگەدەگىنە قاجەتتى ارنايى ترافارەت دايىندالعان. قالعان 308 ۋچاسكەدە ترافارەتتەر تاراتىلعان.
«قيمىل-قوزعالىسى قيىن مۇگەدەكتىگى بار ازاماتتاردى تاسىمالداۋ ءۇشىن ينۆاتاكسيلەر مەن ونلاين سۋردواۋدارماشىلار ىمداۋ ءتىلى قىزمەتتەرىن كورسەتەدى. رەفەرەندۋمدى وتكىزۋگە جاۋاپتى كوميسسيا مۇشەلەرى بىلىكتىلىك سەمينارىنان وتكىزىلگەن. كوشپەلى وقىتۋعا قالا جانە اۋدانداعى اۋماقتىق سايلاۋ كوميسسياسىنىڭ جانە ۋچاسكەلەردەگى رەفەرەندۋم ۋچاسكەلەرىندەگى 1692 مۇشەسى قامتىلدى»، - دەپ اتاپ ءوتتى وبلىستىق سايلاۋ كوميسسياسىنان.
اۆتور
ءادىلجان ۇمبەت
