قىزىلوردا وبلىسىندا 10-سىنىپ وقۋشىسىن ۇرىپ ولتىرگەن جاس ءوسپىرىم سوتتالدى
قىزىلوردا. KAZINFORM - قىزىلوردا وبلىسىندا جاس ءوسپىرىمنىڭ ولىمىنە سەبەپشى بولعان ونىنشى سىنىپ وقۋشىسىنا قاتىستى سوت ۇكىمى شىقتى.
وقيعا شيەلى اۋدانىنا قاراستى ش. قودامانوۆ اۋىلىندا بولعان. سول اۋىلدا تۇراتىن 10-سىنىپ وقۋشىلارى اڭگىمە اراسىندا 9-سىنىپ وقۋشىلارى وزدەرىمەن امانداسپاي، سىيلاماۋشىلىق تانىتىپ جۇرگەنىن العا تارتادى. سودان كەيىن ولاردى تارتىپكە كەلتىرۋ ءۇشىن اۋىل شەتىنە جينالعان.
«سوتتالۋشى ق. توعىزىنشى سىنىپ وقۋشىلارىن ۇرىپ كەلە جاتىپ، جابىرلەنۋشى ا. -نىڭ كوكىرەك تۇسىنان جۇدىرىعىمەن ءبىر مارتە قاتتى سوققى جاساعان. بۇل سوققى جابىرلەنۋشىنىڭ جۇرەگىنىڭ رەفلەكتورلى توقتاۋىنا الىپ كەلگەن. اتالعان جاس ءوسپىرىم اۋىر دەنە جاراقاتىنان وقيعا ورنىندا قايتىس بولعان. بۇل قىلمىستىق ءىس قىزىلوردا وبلىسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدان ارالىق سوتىندا قارالدى. سوت ۇكىمىمەن كامەلەتكە تولماعان سوتتالۋشى ق. ق ر قىلمىستىق كودەكسىنىڭ 106-بابىنىڭ 3-بولىگىندە كوزدەلگەن قىلمىستىق قۇقىق بۇزۋشىلىق جاساعانى ءۇشىن كىنالى دەپ تانىلىپ، وعان 6 جىل 8 اي باس بوستاندىعىنان ايىرۋ جازاسى تاعايىندالدى»، - دەپ ءمالىم ەتتى قىزىلوردا وبلىسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدان ارالىق سوتىنان.
اۆتور
ءادىلجان ۇمبەت
