قىزىلوردا قالاسىنا جارىق ءبىر اپتا ءسونۋى مۇمكىن
قىزىلوردا. KAZINFORM - قىزىلوردا قالاسىنىڭ كەيبىر شاعىن اۋداندارىندا 26-شىلدە مەن 1-تامىز ارالىعىندا جارىق ۋاقىتشا ءسونۋى مۇمكىن. بۇل تۋرالى وبلىستىق ەنەرگەتيكا، تۇرعىن ءۇي-كوممۋنالدىق شارۋاشىلىعى باسقارماسى حابارلادى.
ويتكەنى وسى ۋاقىتتا جاڭا جىلۋ ەلەكتر ورتالىعىنا قوسىلاتىن ەلەكتر جەلىلەرى جاڭارتىلادى. ول ءۇشىن 220 ك ۆ اۋە جەلىسىندە جوسپارلى جوندەۋ جۇمىسى جۇرگىزىلەدى.
- جوندەۋ بارىسىندا ەسكى جەلىدەن جاڭاسىنا كوشۋگە بايلانىستى قالانىڭ كەيبىر شاعىن اۋداندارىندا جارىق ۋاقىتشا ءسونۋى مۇمكىن. جوندەۋ جۇمىستارى تولىق اياقتالعان سوڭ تۇتىنۋشىلاردى ەلەكترمەن قامتۋ قالىپتى رەجيمگە اۋىسادى. ۋاقىتشا قولايسىزدىق ءۇشىن كەشىرىم سۇرايمىز، - دەلىنگەن حابارلامادا.
ال بۇعان دەيىن قىزىلوردا وبلىسى اكىمدىگىنىڭ عيماراتى جوندەلىپ جاتقانىن حابارلاعانبىز.
اۆتور
نازەركە سانيازوۆا
