قىزىلشانىڭ تارالۋى: استانانىڭ سانيتارلىق دارىگەرى اتا-انالارعا ۇندەۋ جاسادى

استانا. KAZINFORM - ەلوردادا قىزىلشا بويىنشا ەپيدەميولوگيالىق جاعداي ۋشىعىپ تۇر. مۇنىڭ باستى سەبەپتەرىنىڭ ءبىرى - ۆاكسيناتسيانىڭ ازدىعى. بۇل اسىرەسە بالالار اراسىندا ءجيى كەزدەسەتىن پروبلەما. وسىعان بايلانىستى استانانىڭ باس مەملەكەتتىك سانيتارلىق دارىگەرى سارحات بەيسەنوۆا اتا-انالارعا ۇندەۋ جاسادى.

ەلوردا اكىمدىگىنىڭ رەسمي سايتىندا جازىلعانداي، تۇرعىنداردىڭ باسىم بولىگىنىڭ قىزىلشاعا قارسى يممۋنيتەتى بولماۋىنىڭ كوپتەگەن سەبەبى بار. سانيتارلىق دارىگەردىڭ ايتۋىنشا، بۇل ۆيرۋستىڭ اينالىمى مەن ەپيدەميولوگيالىق جاعدايدىڭ ناشارلاۋىنا سەبەپ بولىپ وتىر.

«سوندىقتان رەۆاكتسيناتسيا جۇرگىزىپ، بالالارعا ۋاقىتىلى ەكپە الۋى كەرەك. ناۋقاسپەن بايلانىستا بولعان جاعدايدا 72 ساعات ىشىندە شۇعىل تۇردە ەكپە الۋعا بولادى. وسىلايشا، ەكپە الماعان ادامداردى ينفەكسيادان ۋاقىتىلى قورعاۋ جانە ينفەكسيانىڭ ودان ءارى تارالۋىن بولدىرماۋ ماقساتىندا 2528 ادام ۆاكتسينا الدى. سوندىقتان جالعىز ءتيىمدى قورعانىس ۆاكسيناتسيا ەكەنىن تاعى ءبىر رەت اتاپ وتەمىن. بالاسىنىڭ ۋاقىتىلى ەكپە الۋىن ەڭ الدىمەن، اتا- انالارى ويلاۋى كەرەك»، - دەدى سارحات بەيسەنوۆا.

ايتا كەتەيىك، 2023 -جىلدىڭ 6-قاراشاسىنان باستاپ ەلوردادا 6 ايدان 10 اي 29 كۇنگە دەيىن بالالارعا جاپپاي ۆاكسيناتسيا جۇرگىزىلىپ جاتىر. جەلتوقساننان باستاپ ولارعا 2-4 جاستاعى بالالار قوسىلدى.

6-قاراشادان باستاپ قازىرگى ۋاقىتقا دەيىن 47166 بالا ەگىلدى. بۇل - %36,5، ونىڭ ىشىندە 6 ايدان 10 اي 29 كۇنگە دەيىن - 8986 نەمەسە %37,4؛ 2-4 جاس - 27137 نەمەسە %36,5؛ مەديتسينا قىزمەتكەرلەرى - 5351 نەمەسە %89,2.

سونداي-اق ۇلتتىق ۆاكسيناتسيا كۇنتىزبەسىنە سايكەس ۆاكسيناتسيالانباعان بالالاردى انىقتاۋ جۇمىسى جالعاسىپ جاتىر.