قىزىلشا ورشۋىنە بايلانىستى كارانتين جاريالانا ما؟
د س م سانيتارلىق-ەپيدەميولوگيالىق باقىلاۋ كوميتەتى ءتوراعاسىنىڭ ورىنباسارى زاۋرە احمەتوۆا بالالار اراسىندا قىزىلشا اۋرۋى كەڭىنەن تاراپ جاتقانىنا قاراماستان قازاقستاندا كارانتين جاريالانبايتىنىن ايتتى.
«قىزىلشا ۆاكسينا ارقىلى باقىلاۋعا بولاتىن ينفەكسيا تۇرىنە جاتادى. سوندىقتان كارانتين شەكتەۋى ەنگىزىلمەيدى جانە ەنگىزۋ جوسپارلانىپ وتىرعان جوق. ءبىز جاعدايدى باقىلاۋدا ۇستاپ وتىرمىز»، - دەدى كوميتەت ءتوراعاسىنىڭ ورىنباسارى ۇكىمەتتىڭ باسپا ءسوز ورتالىعىندا.
زاۋرە احمەتوۆا كوميتەت اۋرۋدىڭ جەكە وشاقتارىمەن كۇرەسەتىنىن جەتكىزدى. مۇنداي ۇيىمدا كارانتين شەكتەۋى ەنگىزىلۋى مۇمكىن.
«ەگەر بالالار ۇجىمىندا كوپ ادام سىرقاتتانعانى بايقالسا نەمەسە قىزىلشاعا قارسى ەكپە الماعان بالالاردىڭ سانى رۇقسات ەتىلگەن شەكتى دەڭگەيدەن اساتىنىن انىقتاساق، وندا ءدال وسى ۇيىمدا: مەكتەپكە دەيىنگى ۇيىم، مەكتەپ، جوعارى وقۋ ورنى نەمەسە كوللەدجدە جەكە شارا قابىلدانادى»، - دەدى ول.
ايتا كەتەيىك، بۇگىن ۇكىمەت وتىرىسىندا ەلىمىزدە قىزىلشا اۋرۋى ءورشىپ تۇرعانى حابارلانعان ەدى. بيىل قاراشادا 6 مىڭ بالا قىزىلشا جۇقتىرعان.
ەسكە سالايىق، بۇعان دەيىن پرەمەر-مينيستر ءاليحان سمايىلوۆ ەلىمىزدە قىزىلشا اۋرۋىنىڭ ورشۋىنە بايلانىستى دەنساۋلىق ساقتاۋ مينيسترلىگىنە تاپسىرما بەرگەن ەدى.
