قىزىعۋشىلىق وياتۋ ءۇشىن جۇكتەدىك. دەپۋتات - سۋپەرقاھارمان ەلدى دۇرلىكتىرگەن ۆيەدوعا پىكىر ءبىلدىردى

استانا. KAZINFORM - ءماجىلىس دەپۋتاتى رۋسلان بەردەنوۆ وتاندىق ۆيدەوگراف تۇسىرگەن روليكتىڭ قاھارمانىنا اينالدى. وندا ول ەلورداداعى ەڭ ءزاۋلىم عيمارات - ءابۋ-دابي پلازانىڭ توبەسىندە سۋپەرقاھارمان شەكپەنىمەن ءارى سۋپەرقاھارماندارعا ارنالعان مۋزىكا ىرعاعىمەن ەلورداعا كوز سالىپ تۇرادى. وسىعان وراي اگەنتتىك ءتىلشىسى دەپۋتاتقا حابارلاسىپ، ءمان-جايدى انىقتاۋعا تىرىسقان ەدى.

«بۇل - الەۋمەتتىك روليكتىڭ بولىگى. قازىرگى ۋاقىتتا مونتاجداۋ ءجۇرىپ جاتىر. دايىن بولعان كەزدە وزدەرىڭىز دە كورەسىزدەر. مەن جەتكىلىكتى اقپارات بەردىم»، - دەپ جاۋاپ بەردى رۋسلان بەردەنوۆ حابارلاما ارقىلى.

وسىدان كەيىن اگەنتتىك ءتىلشىسى روليك اۆتورى جانە ازىرشە اتاۋى بەلگىسىز بولىپ تۇرعان الەۋمەتتىك جوبانىڭ يدەيالىق كومەكشىسى - ۆيدەوگراف ادىلەت راحمەتۋللاعا حابارلاسقان ەدى. ويتكەنى، ول اتالعان روليكتى الەۋمەتتىك جەلىگە جۇكتەگەن بولاتىن.

«ءبىز الەۋمەتتىك روليك تۇسىرەمىز. بۇل ۆيدەونى قىزىعۋشىلىق وياتۋ ماقساتىندا تۇسىردىك. ال قالعانىن سوڭىندا كورەسىزدەر»، - دەدى بلوگەر.

ولار مۇنان ءارى وقيعانىڭ ءمان-جايىن ايتۋدان باس تارتىپ وتىر.

روليك الەۋمەتتىك جەلىدە ساناۋلى عانا ۋاقىت بولعانىنا قاراماستان، جۇرتشىلىقتىڭ ءبىرازى ونى كورىپ، پىكىرلەرىن قالدىرىپ ۇلگەردى. ءتىپتى، دەپۋتاتتىڭ بۇل ارەكەتىنە تاڭداسىن ءبىلدىرىپ جاتقاندار دا بار.

جەلى قولدانۋشىلارى دەپۋتات وسى ارەكەتى ارقىلى بۋكمەكەرلىك كەڭسەلەرمەن جانە لۋدومانيامەن كۇرەسكە بەل شەشە كىرىستى دەگەن ويدا. ويتكەنى، دەپۋتات اتالعان قوعامدىق كەسەل جايىندا ءجيى ماسەلە كوتەرىپ ءجۇر.

اۆتور
مارلان جيەمباي