قىزدارىمىز ازيا ەلدەرى اراسىندا ۇزدىك ەكەنىن دالەلدەدى - ەلدوس سايدالين
استانا. KAZINFORM - قازاق قىزدارى بوكستان تايلاندتىڭ چيانگماي قالاسىندا وتكەن ازيا چەمپيوناتىندا جالپىكوماندالىق ەسەپتە كوش باستاپ، سارىقۇرلىقتا تەڭدەسسىز ەكەندەرىن دالەلدەدى. بۇل تۋرالى Kazinform تىلشىسىنە ەكسكليۋزيۆ سۇحبات بەرگەن ۇلتتىق قۇرامانىڭ باس باپكەرى ەلدوس سايدالين ايتىپ بەردى.
«ازيا ويىندارىن وتە ءساتتى وتكىزدىك. قازاق قىزدارى 5 قولا، 5 التىن مەدالعا قول جەتكىزىپ، ازيا ەلدەرى اراسىندا وزدەرىنىڭ كوشباسشى ەكەندەرىن دالەلدەدى. بۇل - ءبىزدىڭ ۇلتتىق قۇرامانىڭ اۋىزبىرشىلىگىنىڭ، بەرەكە-بىرلىگىنىڭ ارقاسىندا، تالماي ەڭبەكتەنۋىمەن كەلگەن جەڭىس دەپ ايتا الامىن. ازيا بىرىنشىلىگىنە وتە جوعارى دەڭگەيدە دايىندالدىق. ءار بوكسشىلارىمىزدىڭ جەكە باپكەرلەرى دە شاكىرتتەرى ءۇشىن بارىن سالدى. ءار جەكپە-جەككە تاكتيكا قولدانىپ وتىردىق. سونىڭ ناتيجەسىندە وسىنداي كورسەتكىشكە قول جەتكىزدىك» ، - دەپ اتاپ ءوتتى باس باپكەر ەلدوس جانىبەك ۇلى.
سونىمەن قاتار باس باپكەر بۇل دودا وسى جىلدىڭ سوڭعى باستى دوداسى بولعاندىقتان، جىلدى ءساتتى اياقتاۋدى باستى نازارعا العانىن دا جاسىرمادى.
«وزدەرىڭىز بىلەسىزدەر، بۇل - ازيا چەمپيوناتى بوكسشىلارىمىز ءۇشىن وسى جىلدىڭ سوڭعى باستى دوداسى بولدى. ونى ابىرويمەن اياقتاۋ ءبىزدىڭ باستى ماقساتىمىز بولاتىن. ءبىز سول دەگەنىمىزگە قول جەتكىزدىك دەپ ەسەپتەيمىن. ارينە، بۇل جەڭىستەر ءبىزدىڭ بوكسشى قىزدارىمىزعا وڭاي كەلگەن جوق. ءبىرىنشى رەت ءىرى دودادا باس كيىمسىز قولعاپ ءتۇيىستىرىپ وتىر. باس كيىمسىز جۇدىرىقتاسۋ قىز بالاسىنا وڭاي سوقپايتىنىن جاقسى بىلەسىزدەر. ءبىراق، تارتىپكە باعىنا وتىرىپ، تالاپقا ساي جۇدىرىقتاسىپ، ۇزدىك كورسەتكىشكە قول جەتكىزىپ وتىرمىز. جالپى، ازيا بىرىنشىلىگىندە توعىز مەملەكەتتىڭ قىزدارى جۇلدەگە ىلىكتى. ءبىزدىڭ قىزدار 5 التىن، 5 قولا مەدالمەن مىقتىلىعىن دالەلدەدى»، - دەدى باس باپكەر.
ەستەرىڭىزگە سالا كەتەيىك، وسىعان دەيىن بوكستان قازاقستان ايەلدەر قۇراماسى I ورىنعا يە بولعانىن جازعان بولاتىنبىز
اۆتور كۇنسۇلتان وتارباي
