قىتايمەن شەكارادا جاڭا اينالما جول سالىنادى - ۇكىمەت باسشىسى
استانا. KAZINFORM - ق ر پرەمەر-ءمينيسترى ولجاس بەكتەنوۆ بەلگيالىق Sarens كومپانيالار توبى ديرەكتورلار كەڭەسىنىڭ ءتوراعاسى ليۋدو سارەنسپەن كەزدەسۋ وتكىزدى، دەپ حابارلايدى ۇكىمەتتىڭ باسپا ءسوز قىزمەتى.
وندا «نۇر جولى» وتكىزۋ بەكەتىنىڭ اينالما جولىن سالۋ جوسپارلارى تالقىلاندى. ىنتىماقتاستىقتى، ونىڭ ىشىندە ماشينا جاساۋ سالاسىندا كەڭەيتۋ پەرسپەكتيۆالارى قارالدى.
- جوبا شەكارا ماڭى ينفراقۇرىلىمىنىڭ وتكىزۋ قابىلەتىن ارتتىرۋعا جانە قولدانىستاعى كولىك اعىندارىنا جۇكتەمەنى ازايتۋعا باعىتتالعان. سالماعى 100 توننادان اساتىن ءىرى گاباريتتى جۇكتەردى وتكىزۋگە ارنالعان ۇزىندىعى 3,2 شاقىرىم جانە ەنى 12 مەتر اينالما جول سالۋ، سونداي-اق اۋدانى 81,6 گ ا كولىكتەرگە ارنالعان تۇراقتار سالۋ جوسپارلانىپ وتىر. قوسىمشا اۆتوجول كوپىرىن سالۋ، ءتيىستى ينفراقۇرىلىمدى ورناتۋ قاراستىرىلعان. بارلىق نىسان كومپانيانىڭ جەكە ينۆەستيتسيالارى ەسەبىنەن سالىنادى، ونىڭ جالپى قۇنى شامامەن $50 ميلليوندى قۇرايدى، - دەلىنگەن حابارلامادا.
ولجاس بەكتەنوۆ جوبانىڭ مەملەكەت باسشىسى جۇكتەگەن مىندەتتەرگە سايكەس، ەلىمىزدىڭ كولىك لوگيستيكاسىن، ساۋدا جانە ترانزيتتىك الەۋەتىن دامىتۋداعى ماڭىزدىلىعىن باسا ايتتى. Sarens كومپانياسىنىڭ تاجىريبەسى مەن قۇزىرەتتەرىن ەسكەرە وتىرىپ، لوكاليزاتسيالاۋ دەڭگەيى جوعارى ماشينا جاساۋ سالاسىندا ودان ءارى ىنتىماقتاستىق مۇمكىندىكتەرى اتاپ ءوتىلدى.
كەزدەسۋ سوڭىندا تاراپتار اينالما جول سالۋ جوباسىن جۇزەگە اسىرۋعا ءوزارا مۇددەلىلىگىن جەتكىزىپ، ىنتىماقتاستىقتى كەڭەيتۋگە دايىن ەكەندەرىن ءبىلدىردى.
پرەمەر-مينيستر جاۋاپتى مەملەكەتتىك ورگاندارعا جوبانى ۋاقتىلى جۇزەگە اسىرۋ ءۇشىن قاجەتتى كومەك كورسەتۋدى تاپسىردى.
بۇدان بۇرىن ۇكىمەت ەلىمىزدىڭ 2029 -جىلعا دەيىنگى ۇلتتىق دامۋ جوسپارىنىڭ ماقساتىنا قول جەتكىزۋ جونىندەگى 2025- 2026 -جىلدارعا ارنالعان ءىس-قيمىل باعدارلاماسىن بەكىتكەنى بەلگىلى بولدى.
