قىتايلىقتاردىڭ 70 پايىزى سالماق تاستاعىسى كەلەدى
استانا. KAZINFORM - قىتايلىقتاردىڭ 70 پايىزى سالماق تاستاۋدى ارماندايدى، ال 60 پايىزدان استامى بۇل ماقساتقا جەتۋ ءۇشىن ۋاقىت پەن كۇش جۇمساۋعا دايىن، دەپ حابارلايدى شينحۋا.
بۇل تۋرالى فوشان قالاسىندا (گۋاڭدۇڭ پروۆينتسياسى، وڭتۇستىك قىتاي) سەنبىدە وتكەن سەمىزدىكتىڭ الدىن الۋ جونىندەگى كونفەرەنسيادا جاريالانعان قىتايداعى ەرەسەكتەردىڭ دەنساۋلىعى جانە سالماق باقىلاۋى تۋرالى اق كىتاپتا ايتىلعان.
اق كىتاپتا قىتايدا ءوز سالماعىن ولشەگەن ەرەسەكتەردىڭ جارتىسى ونىڭ ناقتى دەنە ماسساسى يندەكسىنە (د م ي) سايكەس كەلمەيتىنىن انىقتاعانى اتاپ وتىلگەن. اتاپ ايتقاندا، قىتايلىق ەرەسەكتەردىڭ 14 پايىزى ءوز سالماعىن قالىپتى دەپ باعالاعان، ءبىراق شىن مانىندە د م ي ولشەمى بويىنشا ارتىق سالماعى بار بولىپ شىققان.
قىتايدىڭ پروفيلاكتيكالىق مەديتسينا قوعامىنىڭ ءتوراعاسىنىڭ ورىنباسارى ليان شياۋفەننىڭ پىكىرىنشە، ءوزىن-ءوزى باعالاۋداعى مۇنداي دالسىزدىك جۇرەك-قان تامىرلارى جانە سەرەبروۆاسكۋليارلىق اۋرۋلاردىڭ، قانت ديابەتىنىڭ جانە باسقا دا سوزىلمالى اۋرۋلاردىڭ الدىن الۋ مەن باقىلاۋدى قيىنداتادى. ءوز كەزەگىندە بۇل حالىقتىڭ سەمىزدىكتىڭ دەنساۋلىققا قاۋپى تۋرالى جەتكىلىكسىز تۇسىنىگىن كورسەتەدى.
قىتايدىڭ دەنساۋلىق ساقتاۋ ىستەرى جونىندەگى مەملەكەتتىك كوميتەتىنىڭ دەرەكتەرى بويىنشا، قازىرگى ۋاقىتتا قىتايلىق ەرەسەكتەردىڭ 34,3 پايىزى ارتىق سالماقتان زارداپ شەگەدى، ال 16,4 پايىزى سەمىزدىككە شالدىققان. ەگەر بۇل قاۋىپكە قارسى شارالار قابىلدانباسا، 2030 -جىلعا قاراي قىتايدىڭ ەرەسەك حالقىنىڭ 70,5 پايىزى ارتىق سالماقتان نەمەسە سەمىزدىكتەن زارداپ شەگەتىن بولادى، بۇل 61 ميلليارد ا ق ش دوللارى كولەمىندە مەديتسينالىق شىعىندارعا اكەلەدى.
وسىعان جاۋاپ رەتىندە 2024 -جىلدىڭ ماۋسىم ايىندا بيلىك سالماق باقىلاۋ ءۇشىن قولايلى جاعدايلار جاساۋعا باعىتتالعان ءۇش جىلدىق جالپى ۇلتتىق ناۋقاندى باستادى. كوپتەگەن اۋرۋحاناعا سەمىزدىكتىڭ الدىن الۋ جانە وعان قارسى كۇرەس ورتالىقتارىن قۇرۋ ۇسىنىلدى. وندا سالماق تاستاۋ بويىنشا ستاتسيونارلىق قىزمەتتەر كورسەتىلەدى. 2025 -جىلدىڭ ماۋسىمىنا قاراي مۇنداي قىزمەتتەردىڭ دەرلىك تولىق قامتىلۋىنا قول جەتكىزىلەدى دەپ كۇتىلىپ وتىر.
اق كىتاپتا قازىرگى ۋاقىتتا قىتاي حالقىنىڭ جارتىسىنان استامى سالماعىن باقىلاۋ ءۇشىن بەلسەندى قادامدار جاساپ جاتقانى، مايى، تۇزى جانە قانتى از ديەتالاردى ۇستاناتىنى جانە تاعامعا قولايلى بالامالاردى تاڭدايتىنى ايتىلعان.
بۇعان دەيىن قىتاي جەردىڭ ەلەكتروماگنيتتىك ءورىسىن باقىلاۋ ءۇشىن 3 جەر سەرىگىن ۇشىرعانىن جازدىق.
