قىتايلىقتار قانشا زەينەتاقى الادى
استانا. KAZINFORM - قىتايدا بازالىق زەينەتاقى تولەمدەرى 2025-جىلى 2 پايىزعا ارتادى، بۇل ەڭ باياۋ ءوسۋ قارقىنى نەمەسە تاريحتاعى ەڭ ناشار كورسەتكىش. بۇل تۋرالى بەيجىڭدەگى Caixin Global باسىلىمى حابارلايدى.
زەينەتاقىنى تۇراقتى ارتتىرۋ ساياساتى 2011-جىلعى «الەۋمەتتىك قامسىزداندىرۋ تۋرالى» زاڭدا بەكىتىلگەن. وعان سايكەس، جالاقى مەن ينفلياتسيانىڭ ءوسۋى سياقتى فاكتورلار ەسكەرىلىپ، زەينەتاقى تولەمدەرى رەداكسيالانادى.
2005-2015-جىلدار ارالىعىندا زەينەتاقى تولەمدەرى جىلىنا ورتا ەسەپپەن 10 پايىز ءوستى. ناتيجەسىندە جەكە كومپانيالار قىزمەتكەرلەرىنىڭ ورتاشا زەينەتاقىسى 700 يۋاننان (100 دوللار) 2000 يۋانعا دەيىن كوبەيدى. الايدا سودان بەرى زەينەتاقى ءوسىمى باسەڭدەپ قالدى. ءوسىم 2016-جىلى 6,5 پايىز، 2020-جىلى 5 پايىز، 2023 جانە 2024-جىلدارى تيىسىنشە 3,8 جانە 3 پايىز بولدى.
حالىقتىڭ تەز قارتايۋى زەينەتاقى جۇيەسىنىڭ ۇزاقمەرزىمدى ومىرشەڭدىگىنە كۇمان كەلتىرىپ وتىر، دەپ تۇسىندىرەدى Ekd.me ينتەرنەت-باسىلىمى. زەرتتەۋلەرگە سايكەس، قىتايدىڭ زەينەتاقى قورى 10 جىلدان كەيىن تاپشىلىققا ۇشىراۋى مۇمكىن. سونىمەن قاتار ەلدەگى قالا مەن اۋىلدىڭ زەينەتاقىسى ايتارلىقتاي ەرەكشەلەنەدى.
ۇكىمەتتىڭ 2024-جىلعى دەرەكتەرىنە سايكەس، قىتايدا قالالىق جۇمىسشىنىڭ ورتاشا زەينەتاقىسى - 3825 يۋان (530 دوللار)، ال اۋىلدىق جەردە 246 يۋان (34 دوللار).
ەسكە سالا كەتەيىك، قىتايدا ەڭ ءىرى اينالمالى ەلەكتر جەتكىزۋ جەلىسى سالىندى.
