قىتايلىق ينۆەستورلار تۇركىستاندا شۇلىق شىعاراتىن بولدى
تۇركىستان. KAZINFORM - تۇركىستان وبلىسىندا ءبىر كۇندە 2 كاسىپورىن اشىلىپ، 1 زاۋىتتىڭ كاپسۋلاسى سالىندى.
بۇگىن «TURKISTAN» يندۋستريالدى ايماعىندا قازاقستان مەن قىتاي ينۆەستورلارىنىڭ بىرلەسكەن جوباسىمەن شۇلىق جانە شۇلىق بۇيىمدارىن شىعاراتىن كاسىپورىن ىسكە قوسىلدى. بۇل جوبانىڭ قۇنى - 1 ميلليارد تەڭگە. كاسىپورىن كۇنىنە 32 مىڭ جۇپ شۇلىق شىعارۋعا قاۋقارلى. 30 جۇمىس ورنى اشىلعان.
ينۆەستورلار شۇلىق فابريكاسى تولىق قۋاتىنا جەتكەن سوڭ تۇركىستاندا كوستيۋم شىعاراتىن جوبانى دا جۇزەگە اسىرماق. بۇل جوباعا 2,8 ميلليارد تەڭگە ينۆەستيسيا سالىنادى. كۇنىنە 500 كوستيۋم تىگىلەدى دەپ كۇتىلىپ وتىر.
سونداي-اق، «TURKISTAN» يندۋستريالدى ايماعىندا جيھاز شىعاراتىن كاسىپورىن ىسكە قوسىلدى.
مۇندا 50 گە جۋىق جاڭا جۇمىس ورنى قۇرىلدى. زاماناۋي، سوڭعى ۇلگىدەگى تەحنولوگيالارمەن جابدىقتالعان سەح كۇنىنە 600 دانا جيھاز شىعارۋعا قاۋقارلى. اتالعان كاسىپورىن وبلىس مەكتەپتەرىن، بالاباقشالارىن، سونىمەن بىرگە، وڭىردە اشىلىپ جاتقان عيماراتتاردى تولىقتاي جيھازبەن قامتۋعا ۇلەس قوسپاق.
تۇركىستانداعى «TURAN» ارنايى ەكونوميكالىق ايماعىندا سەندۆيچ-پانەل شىعاراتىن جاڭا زاۋىتتىڭ كاپسۋلاسى سالىندى.
بۇل ماڭىزدى ءارى زاماناۋي جوبانىڭ ينۆەستيتسيالىق قۇنى - 1,54 ميلليارد تەڭگە. جاڭادان 32 دەن استام جاڭا جۇمىس ورنى قۇرىلادى. مۇندا سەندۆيچ-پانەلدەر، گوفرلەنگەن قاڭىلتىرلار، مەتالل پليتكالار جانە وزگە دە قۇرىلىسقا قاجەتتى زاتتار شىعارىلادى دەپ جوسپارلانعان. بۇگىندە زاۋىت سالىناتىن جەر ءبولىنىپ، ءتيىستى جۇمىستار باستالىپ كەتكەن.
سالتاناتتى شاراعا وبلىس اكىمى دارحان ساتىبالدى مەن ينۆەستورلار ارنايى قاتىسىپ، جۇرتشىلىقتى قۇتتىقتادى.
«مەملەكەت باسشىسى قاسىم-جومارت كەمەل ۇلىنىڭ تاپسىرماسىنا سايكەس، وبلىسىمىزدىڭ وڭدەۋ ونەركاسىبىن دامىتۋ ءۇشىن جانە قالا تۇرعىندارىنا جۇمىس ورىندارىن اشۋعا ۇلەسىن قوساتىن جاڭا زاۋىت قۇرىلىسى باستالعالى تۇر. «Panel Sistem KZT» كومپانياسى جوباسىنىڭ ىسكە قوسىلۋى وبلىستىڭ الەۋمەتتىك- ەكونوميكالىق دامۋىنا تىڭ سەرپىن بەرىپ، وتاندىق ونىمدەرمەن قامتاماسىز ەتۋ كولەمىن ارتتىرۋعا جانە حالىقتىڭ ءال-اۋقاتىن كوتەرۋگە ءوز سەپتىگىن تيگىزەدى. ءبىز ينۆەستيسيا تارتۋ، كاسىپورىندار مەن جۇمىس ورىندارىن اشۋعا باسىمدىق بەرىپ وتىرمىز. جۇمىستار جالعاسادى. باستاماعا ساتتىلىك جانە تابىس تىلەيمىن!» - دەدى دارحان ساتىبالدى.
تاعى ءبىر جاڭالىق، تۇركىستاندا پاندەميا كەزىندە جۇمىسىن ۋاقىتشا توقتاتقان «Golden Camel» زاۋىتى ءوز جۇمىسىن قايتا باستادى. ءوندىرىس ورنى تۇيە جانە بيە سۇتىنەن قۇرعاق ءسۇت شىعارۋمەن اينالىسادى. سونىمەن قاتار مۇندا ۇلتتىق سۋسىن سوڭعى پروتسەسكە دەيىن وڭدەلىپ، كوسمەتيكالىق ونىمدەر مەن تۇرمىستىق حيميالىق سۇيىقتىقتار شىعارىلادى.
اۆتور
قايرات زاينيشەۆ
