قىتايلىق جاس ءجۇزۋشى الەمدىك رەكورد ورناتتى
استانا. KAZINFORM - يۋي جىدي قىتاي قۇراماسى ساپىندا ەركىن ستيلدەگى 4x200 مەترلىك ايەلدەر ەستافەتاسىندا الەم چەمپيوناتىنىڭ قولا جۇلدەگەرى اتاندى، دەپ جازدى ءازارتادج.
ول فينالدا جۇزبەگەنىمەن، ىرىكتەۋ كەزەڭىندەگى قاتىسۋىنىڭ ارقاسىندا مەدال يەلەنەدى. 12 جاسىندا يۋي جىدي ءجۇزۋ بويىنشا الەم چەمپيوناتتارىنىڭ تاريحىنداعى ەڭ جاس جۇلدەگەر بولىپ تىركەلدى.
Swimming World جۋرنالىنىڭ حابارلاۋىنشا، يۋي جىدي - سوڭعى 89 جىلداعى حالىقارالىق جارىستاردا مەدال جەڭىپ العان ەڭ جاس سپورتشى. 1936 -جىلعى بەرليندەگى وليمپيادا ويىندارىندا دات سپورتشىسى ينگە سيەرەنسەن 200 مەترلىك براسس ادىسىندە 12 جاسقا تولعانىنان ءبىر اي وتپەي جاتىپ قولا مەدال جەڭىپ العان. ال يۋي قازان ايىندا عانا 13 جاسقا تولادى.
ءازارتادج حابارلاعانداي، بۇعان دەيىن يۋي جىدي جەكە قاشىقتىقتاردا ەكى رەت ءتورتىنشى ورىن العان - 200 مەتر كەشەندى ءجۇزۋ جانە باتتەرفلياي ادىسىمەن. بۇل چەمپيوناتتا وعان 400 مەتر كەشەندى ءجۇزۋ سايىسىندا قاتىسۋ قالدى.
مامىر ايىندا وتكەن قىتاي چەمپيوناتىندا يۋي 200 مەترلىك كەشەندى جۇزۋدە 2 مينۋت 10,63 سەكۋند كورسەتىپ، كۇمىس مەدال جەڭىپ الىپ، ءوز جاس كاتەگورياسىنداعى ەڭ ۇزدىك ناتيجە كورسەتتى. وسى ناتيجەلەردىڭ نەگىزىندە ول الەم چەمپيوناتىنا جولداما الدى. يۋي الەم چەمپيوناتىنا قاتىسقان ەڭ جاس جۇزۋشىلەردىڭ ءبىرى - باحرەيندىك الزاين تارەكتەن كەيىنگى ەكىنشى ورىندا تۇر. الزاين 2015 -جىلى قازاندا وتكەن چەمپيوناتتا نەبارى 10 جاسىندا جارىسقا قاتىسقان.
حالىقارالىق سۋ سپورتى فەدەراتسياسى (World Aquatics) جارىستارعا ەڭ تومەنگى جاس شەگىن 14 جاس دەپ بەلگىلەگەن. الايدا، ەگەر سپورتشىنىڭ ناتيجەسى ىرىكتەۋ نورماتيۆىنەن اسىپ كەتسە، جاس ەرەكشەلىگىنە قاراماستان، جارىسقا قاتىسۋعا رۇقسات بەرىلەدى.
2025 -جىلعى سۋ سپورتتارى بويىنشا الەم چەمپيوناتى 11-شىلدە مەن 3 -تامىز ارالىعىندا سينگاپۋردا وتۋدە. باستاپقىدا بۇل چەمپيونات قازاندا ءوتۋى ءتيىس بولعان، ءبىراق World Aquatics شەشىمىمەن سينگاپۋرعا اۋىستىرىلدى. جارىسقا 206 ەلدەن شامامەن 2500 سپورتشى قاتىسىپ جاتىر.
بۇل تۋرنيردە 77 مەدال جيىنتىعى ساراپقا سالىنىپ، رەكوردتىق كورسەتكىش تىركەلمەك. سونداي-اق، 6 ميلليون دوللاردان استام جالپى جۇلدە قورى جانە جۇزۋدەن جاڭا الەمدىك رەكورد ورناتقان سپورتشىعا 30000 دوللار كولەمىندە بونۋس قاراستىرىلعان.
