قىتايدىڭ ينتەللەكتۋالدى ءبىلىم پلاتفورماسى رەكورد جاڭارتتى
استانا. KAZINFORM - قىتايدىڭ Smart Education ونلاين-ءبىلىم بەرۋ پلاتفورماسىنىڭ پايدالانۋشىلارى 164 ميلليوننان استى، دەپ جازادى شينحۋا.
قىتايدىڭ مەملەكەتتىك سيفرلىق ءبىلىم بەرۋ قىزمەتتەرىن ۇسىنۋعا ارنالعان Smart Education of China ينتەللەكتۋالدى ونلاين- پلاتفورماسىندا تىركەلگەن پايدالانۋشىلار سانى 2025 -جىلدىڭ ءساۋىر ايىنداعى جاعداي بويىنشا 164 ميلليوننان اسىپ كەتتى. بۇل تۋرالى قىتايداعى ينتەللەكتۋالدى ءبىلىم بەرۋ بويىنشا اق كىتاپتا ايتىلدى.
اتالعان اق كىتاپ جۇما كۇنى، 14-16- مامىر ارالىعىندا ورتالىق قىتايدىڭ حۋبەي پروۆينتسياسى ۋحان قالاسى وتكەن 2025 -جىلعى دۇنيەجۇزىلىك تسيفرلىق ءبىلىم بەرۋ كونفەرەنتسياسىندا جاريالاندى. قۇجاتتا كورسەتىلگەندەي، ءساۋىر ايىنداعى جاعداي بويىنشا بۇل پلاتفورما 61,3 ميللياردتان استام رەت قارالعان. پلاتفورماعا 220 دان استام ەل مەن ايماق تۇرعىندارى كىرىپ كورگەن.
پلاتفورما باستاۋىش جانە ورتا بىلىمگە ارنالعان 110 مىڭنان استام تسيفرلىق ءبىلىم بەرۋ رەسۋرستارىن، كاسىپتىك ءبىلىم بەرۋ ءۇشىن 11,3 مىڭنان استام، جوعارى بىلىمگە 31 مىڭنان استام جانە ءومىر بويى وقۋعا ارنالعان 2 مىڭنان استام ونلاين-كۋرستى قامتيدى.
اق كىتاپتا ايتىلعانداي، پلاتفورما 51 قىزمەت ءتۇرىن - سونىڭ ىشىندە جۇمىسقا ورنالاستىرۋ، ەمتيحان تاپسىرۋ سياقتى سەرۆيستەردى 8 نەگىزگى ساناتقا بىرىكتىرىپ وتىر. ول جاساندى ينتەللەكت پەن ءبىلىم بەرۋدىڭ تەرەڭ ينتەگراتسياسى ارقىلى ەرەكشەلەنەدى.
قازىر قىتاي الەۋمەتتىك ادىلەتتى، ساپالى، ينتەللەكتۋالدى جانە بارشاعا قولجەتىمدى، ءومىر بويى ءبىلىم الۋعا مۇمكىندىك بەرەتىن زاماناۋي تسيفرلىق ءبىلىم بەرۋ جۇيەسىن قالىپتاستىرىپ كەلەدى.
Smart Education of China پلاتفورماسى 2022 -جىلدىڭ ناۋرىز ايىندا ىسكە قوسىلعان. ول وقىتۋ، وقىتۋ ۇدەرىسى، مەكتەپتەردى باسقارۋ جانە ءبىلىم بەرۋ يننوۆاتسيالارى سياقتى سالالارعا باعىتتالعان. سونداي-اق ول الەمدەگى ەڭ ءىرى ءبىلىم بەرۋ رەسۋرستارى قويمالارىنىڭ بىرىنە اينالدى.
