قىتايدىڭ وڭتۇستىگىندە تولاسسىز جاۋعان جاڭبىردان قازا تاپقاندار بار
استانا. KAZINFORM - وتكەن دەمالىس كۇندەرى قىتايدىڭ وڭتۇستىك ايماقتارىندا جاڭبىر جاۋىپ، اپتا باسىندا نوسەر جاۋادى دەپ كۇتىلىپ وتىر، دەپ حابارلايدى Kazinform مەنشىكتى ءتىلشىسى.
قىتايدىڭ ۇلتتىق مەتەورولوگيالىق ورتالىعىنىڭ حابارلاۋىنشا، ەلدىڭ وڭتۇستىگىندەگى گۋاڭشي- چجۋان اۆتونوميالىق اۋدانىنداعى ءبىر ەلدى مەكەندە سۋ تاسقىنىنان قازا تاپقاندار سانى التى ادامعا جەتتى، تاعى ەكەۋى ءىز- ءتۇزسىز جوعالدى.
وتكەن دەمالىس كۇندەرى اۋا رايىنىڭ قولايسىزدىعىنا بايلانىستى گۋاڭدۋڭ پروۆينتسياسىنىڭ گۋاڭجوۋ جانە شەنجىن قالالارىندا 700 دەن استام رەيس كەيىنگە قالدىرىلدى جانە توقتاتىلدى.
مەتەورولوگتاردىڭ مالىمەتىنشە، قىتايدىڭ وڭتۇستىگىندە 2025 -جىلدىڭ باسىنان بەرگى ەڭ قاتتى جاڭبىر 27-29 - مامىر ارالىعىندا جاۋادى. تابيعي اپاتتار قاۋپى جوعارى.
جەكسەنبى كۇنى قىتاي بيلىگى وڭتۇستىك-باتىس يۋننان پروۆينتسياسىندا سۋ تاسقىنى قاۋپىنە بايلانىستى «كوگىلدىر» ەسكەرتۋ جاريالادى.
بۇعان دەيىن ءۇندىستاندا نوسەر جاۋىننان 45 ادام قازا تاپقانىن جازعان بولاتىنبىز.
