قىتايدان كەلگەن تۋريستەر لەگى 9 ەسەگە ارتتى
استانا. KAZINFORM - قازاقستان قىتايدىڭ تۋريستىك نارىعىنداعى ورنىن نىعايتىپ كەلەدى. 27-29-مامىر كۇندەرى قىتايدىڭ شاڭحاي قالاسىندا ءوتىپ جاتقان ITB China 2025 حالىقارالىق كورمەسىنە قازاقستان دا قاتىسىپ جاتىر. بۇل تۋرالى تۋريزم جانە سپورت مينيسترلىگى ءمالىم ەتتى.
وندا ەلىمىز 162 شارشى مەتردى قامتيتىن ءبىرىڭعاي ۇلتتىق ستەندپەن وتاندىق تۋريزمدى كەلۋشىلەرگە تانىستىرۋدا. كورمە الاڭىندا ىسكەرلىك كەزدەسۋلەر، تانىستىرىلىمدار مەن تۋريستىك ونىمدەردى دامىتۋعا ارنالعان ايماقتار قاراستىرىلعان.
وتاندىق دەلەگاتسيا قۇرامىندا قر تۋريزم جانە سپورت مينيسترلىگىنىڭ، Kazakh Tourism ۇك اق، سونداي-اق استانا، الماتى، اقمولا، ماڭعىستاۋ جانە الماتى وبلىسىنىڭ تۋريزم باسقارمالارىنىڭ، قوناق ءۇي بيزنەسىنىڭ جانە جەتەكشى تۋريستىك كومپانيالاردىڭ وكىلدەرى بار.
- كورمەنىڭ رەسمي اشىلۋ راسىمىنە Messe Berlin GmbH كومپانياسىنىڭ اعا ۆيتسە-پرەزيدەنتى داۆيد ريۋتس، ۆيتسە-پرەزيدەنتى داۆيد اكسەتيس، مالايزيانىڭ تۋريزم، ونەر جانە مادەنيەت ءمينيسترى داتو سري تيونگ كينگ سينگ، سونداي-اق دۇنيەجۇزىلىك تۋريستىك اليانس (World Tourism Alliance, WTA) ۇيىمىنىڭ ءتوراعا ورىنباسارى پەن سيۋي قاتىستى. قۇرمەتتى قوناقتار ەلىمىزدىڭ ستەندىمەن تانىسىپ، ءداستۇرلى قازاق تاعامدارىنان ءدام تاتىپ، ەلىمىزدىڭ قوناقجايلىعى مەن مادەني الۋان تۇرلىلىگىنە جوعارى باعا بەردى. ۇلتتىق ستەندتە استانا مەن الماتى قالالارىنىڭ تۋريستىك الەۋەتىنە، سونداي- اق وڭىرلىك تابيعي جانە مادەني باعىتتارعا ەرەكشە نازار اۋدارىلعان، - دەلىنگەن حابارلامادا.
كەلۋشىلەرگە ارنايى بەينەماتەريالدار، قىتاي تىلىندەگى اقپاراتتىق ماتەريالدار جانە ىسكەرلىك كەزدەسۋلەر ۇسىنىلعان.
- قىتاي - قازاقستان ءۇشىن نەگىزگى تۋريستىك نارىقتاردىڭ ءبىرى. ق ر ۇ ق ك شەكارا قىزمەتىنىڭ دەرەكتەرىنە سايكەس، 2024 -جىلى قىتايدان كەلگەن تۋريستەر سانى 650 مىڭ ادامنان اسىپ، 2019 -جىلمەن سالىستىرعاندا 9 ەسە وسكەن، - دەپ جازدى ۆەدومستۆودان.
تەك 2024 -جىلى ەلىمىزدەگى قوناقۇيلەردە 173987 قىتايلىق تۋريستكە قىزمەت كورسەتىلگەن. بۇل 2023 -جىلمەن سالىستىرعاندا %66 عا كوپ.
- تۋريستەر اعىنىنىڭ ارتۋىنا ەكى ەل اراسىندا ۆيزاسىز رەجيمنىڭ ەنگىزىلۋى، اۋە رەيستەرىنىڭ كوبەيۋى جانە قىتاي نارىعىنا باعىتتالعان اقپاراتتىق جۇمىستىڭ جۇيەلى تۇردە جۇرگىزىلۋى ىقپال ەتتى. قازاقستاننىڭ حالىقارالىق كورمەلەرگە بەلسەندى قاتىسۋى تۋريستەر سانىن ارتتىرۋعا جانە ەلدىڭ قىتاي ساياحاتشىلارى اراسىنداعى تانىمالدىعىن كوتەرۋگە زور مۇمكىندىك بەرىپ وتىر، - دەپ حابارلادى مينيسترلىكتەن.
ITB China - قىتايداعى ەڭ ءىرى B2B فورماتىنداعى تۋريستىك كورمەلەردىڭ ءبىرى. بيىلعى كورمەگە 80 ەلدەن 600 دەن استام ەكسپونەنت قاتىسۋدا. ءىس-شاراعا 15000 نان استام سالالىق مامان، ونىڭ ىشىندە 1000 بايەر مەن 250 ب ا ق وكىلى قاتىسادى دەپ كۇتىلەدى.
