قىتايدان جاڭا ەنەرگەتيكالىق لوكوموتيۆتەردىڭ العاشقى پارتياسى قازاقستانعا جونەلتىلدى
استانا. KAZINFORM - قىتايدىڭ China Railway Rolling Stock Corporation (CRRC) كورپوراتسياسى مەن «قازاقستان تەمىر جولى» ۇلتتىق كومپانياسى اراسىنداعى ەنەرگەتيكالىق ىنتىماقتاستىق جوباسى اياسىندا دايىندالعان CKD6H لوكوموتيۆتەرى قىتايدىڭ CRRC Ziyang Locomotive Co.، Ltd. زاۋىتىنىڭ ءوندىرىس جەلىسىنەن ءساتتى شىعارىلدى. لوكوموتيۆتەر ماۋسىم ايىندا قازاقستانعا جەتكىزىلەدى. بۇل تۋرالى قىتايدىڭ ۇلتتىق تەمىرجول باسقارماسىنىڭ رەسمي سايتى حابارلادى.
ۇلتتىق باسقارمانىڭ اتاپ وتۋىنشە، «ءبىر بەلدەۋ، ءبىر جول» باستاماسىن ىسكە اسىرۋدىڭ جارقىن ۇلگىسىن كورسەتكەن بۇل جوبا قازاقستان تەمىر جول كولىگىنىڭ جاسىل ەنەرگياعا كوشۋىنە جاڭا سەرپىن بەرىپ، وڭىرلىك ءوزارا بايلانىستى نىعايتۋعا ەلەۋلى ۇلەس قوسپاق.
بەلگىلى بولعانداي، CKD6H لوكوموتيۆى CRRC كومپانياسىنىڭ ستاندارتتى جاڭا ەنەرگيا پلاتفورماسى نەگىزىندە، ورتالىق ازيانىڭ ايازدى كليماتتىق جاعدايىنا بەيىمدەلىپ جوبالانعان.
لوكوموتيۆكە ىشتەن جاناتىن قوزعالتقىش پەن قۋات باتارەياسى ۇيلەستىرىلگەن گيبريدتى جۇيە قولدانىلعان. سيفرلىق تەحنولوگيا، جاساندى ينتەللەكت ەلەمەنتتەرى جانە جاسىل ەنەرگيا بىرىكتىرىلگەن بۇل قۇرىلعى «جاسىل، ءقاۋىپسىز، اقىلدى، ۇنەمدى جانە سەنىمدى» بولۋىمەن ەرەكشەلەنەدى.
ايتىلۋىنشا، ءداستۇرلى ديزەلدى لوكوموتيۆتەرمەن سالىستىرعاندا CKD6H لوكوموتيۆىنە ورناتىلعان ينتەللەكتۋالدى ەنەرگيا جۇيەسى وتىن شىعىنىن 45 پايىزعا دەيىن قىسقارتىپ، شۋ دەڭگەيىن 80 پايىزعا تومەندەتۋگە، سونىمەن قاتار، زياندى زاتتاردىڭ شىعارىلۋىن ايتارلىقتاي ازايتۋعا مۇمكىندىك بەرەدى.
لوكوموتيۆتىڭ ءار بىرلىگى جىلىنا ورتا ەسەپپەن 240 توننا كومىرقىشقىل گازىن از شىعارادى.
بۇعان دەيىن قىتايدىڭ تانشان قالاسىنان استانا قالاسىنا LRT ۆاگوندارىنىڭ العاشقى ەكى قۇرامى جىبەرىلگەنىن جازعان بولاتىنبىز.
اۆتور
ەرلان مازان
