قىتايدان ا ق ش- قا جەتكىزىلىمدى توقتاتتى
استانا. قازاقپارات- Temu قىتايدان ا ق ش- قا تىكەلەي جەتكىزۋدى توقتاتاتىنىن مالىمدەدى. ەندى امەريكالىقتار ماركەتپلەيستەن تەك ا ق ش اۋماعىنداعى قويمالاردا بار تاۋارلاردى عانا ساتىپ الا الادى.
بۇل قادام ارقىلى Temu ترامپ اكىمشىلىگى ەنگىزگەن قىتايلىق يمپورتقا سالىنعان قوسىمشا سالىقتاردى اينالىپ ءوتۋدى كوزدەيدى.
وسى جىلدىڭ 2 -مامىرىندا اق ءۇي بۇرىنعى de minimis ەرەجەسىنىڭ كۇشىن جويعانىن رەسمي تۇردە جاريالادى. بۇل ەرەجە بويىنشا ا ق ش- قا جىبەرىلەتىن قۇنى $800-دەن اسپايتىن شاعىن سالەمدەمەلەرگە سالىق سالىنبايتىن. وسى جەڭىلدىك ارقاسىندا Temu ،Shein جانە AliExpress سياقتى ءىرى قىتايلىق ماركەتپلەيستەر ا ق ش- قا ساپاسى ونشا ەمەس، ارزان تاۋارلاردى جاپپاي ەكسپورتتاپ كەلدى. رەسمي مالىمەتتەرگە سايكەس، ا ق ش كۇنىنە قىتايدان 4 ميلليونعا دەيىن ارزان سالەمدەمە قابىلداعان.
ەندى بۇل اعىم مۇلدە توقتاماسا دا، ايتارلىقتاي ازايادى. قازىرگى ەرەجەگە سايكەس، قىتايدان كەلگەن بارلىق سالەمدەمەلەرگە تاۋار باعاسىنىڭ %120- ى كولەمىندە سالىق نەمەسە ءاربىر سالەمدەمەگە $100 كولەمىندە تۇراقتى سالىق سالىنادى. 1 -ماۋسىمنان باستاپ بۇل سالىق مولشەرى ەكى ەسە وسەدى، دەپ جوسپارلانعان.
پرەزيدەنت دونالد ترامپ de minimis ەرەجەسىن جويۋدىڭ ەكى نەگىزگى سەبەبىن اتادى. ءبىرىنشىسى - شاعىن جانە ورتا بيزنەستى ادىلەتسىز باسەكەدەن قورعاۋ. ونىڭ ايتۋىنشا، ارزان ءارى ساپاسىز تاۋارلاردى ۇسىناتىن قىتايلىق ماركەتپلەيستەر مەن ولاردىڭ اگرەسسيۆتى جارناما ساياساتى - «شاعىن بيزنەسكە قارسى باعىتتالعان الاياقتىق».
ەكىنشى سەبەپ - ەسىرتكى تاسىمالىمەن كۇرەس. اق ءۇيدىڭ رەسمي سايتىندا قىتايدان كەلگەن زاڭدى سالەمدەمە رەتىندە جاسىرىلعان تىيىم سالىنعان زاتتار، اتاپ ايتقاندا فەنتانيل جانە باسقا سينتەتيكالىق وپيويدتار ەلگە كىرىپ جاتقانىن مالىمدەگەن.
بۇعان دەيىن ترامپ اكىمشىلىگى قىتاي يمپورتىنا سالىناتىن سالىقتى %145- عا دەيىن كوتەرگەن بولاتىن. بۇل ءبىرىنشى كەزەكتە ءىرى ماركەتپلەيستەرگە اسەر ەتتى. ماسەلەن، جىلدام ءسان ونىمدەرىن ساتاتىن Shein كەيبىر تاۋارلارىنا باعانى %300- عا دەيىن كوتەرسە، Temu يمپورتتىق سالىقتارى كەيبىر تاۋارلاردىڭ ءوز باعاسىنان اسىپ كەتتى. سونىمەن قاتار، ەكى پلاتفورما دا ا ق ش- تاعى جارناما شىعىندارىن كۇرت قىسقارتتى.
وسىلايشا، ا ق ش ىشكى نارىعىن جانە ءوز شاعىن جانە ورتا بيزنەسىن سىرتقى ەكسپانسيادان قورعاي باستادى. ال قازاقستاندا بولسا، قىتايلىق ماركەتپلەيستەر كەرىسىنشە كۇشەيىپ كەلەدى، سەبەبى ولار قازاقستاندىق نارىقتا جەرگىلىكتى كاسىپكەرلەرمەن سالىستىرعاندا اناعۇرلىم ءتيىمدى شارتتارعا يە.
اۆتور
اينۇر تۋماكبايەۆا
