قىتايداعى وتانداستار رەفەرەندۋمدا العاشقىلاردىڭ ءبىرى بولىپ داۋىس بەرەدى

استانا. KAZINFORM - ا ە س سالۋ بويىنشا رەفەرەندۋمدا داۋىس بەرۋ ءۇشىن العاشقىلاردىڭ ءبىرى بولىپ قىتايدا شەتەلدىك ۋچاسكەلەر اشىلادى.

رەفەرەندۋم ۋچاسكەلەرى قازاقستاننىڭ بەيجىڭ، شاڭحاي جانە گونكونگتاعى ديپلوماتيالىق وكىلدىكتەرىنىڭ اۋماقتارىندا ۇيىمداستىرىلعان. № 389 ۋچاسكە قازاقستاننىڭ قىتايداعى ەلشىلىگىنىڭ عيماراتىندا - بەيجىڭ قالاسىندا ورنالاسقان.

- رەسپۋبليكالىق رەفەرەندۋمعا دايىندىق جۇمىستارى جۇرگىزىلىپ جاتىر. داۋىس بەرۋ كۇنى، ورنى جانە ۋاقىتى تۋرالى اقپارات ورنالاستىرىلدى، - دەپ حابارلادى № 389 ۋچاسكەسىندەگى سايلاۋ كوميسسياسىنىڭ ءتوراعاسى نۇرلان اققوشقاروۆ.

ونىڭ ايتۋىنشا، № 389 رەفەرەندۋم ۋچاسكەسىنە بەيجىڭنىڭ جوعارى وقۋ ورىندارىندا وقيتىن ستۋدەنتتەر، سونداي-اق ق ح ر- دا ۋاقىتشا جۇمىس ىستەيتىن جانە تۇراتىن وتانداستارىمىز، قازاقستاندىق تۋريستەر جانە ءىسساپاردا جۇرگەندەر كەلەدى دەپ جوسپارلانعان.

بەيجىڭ، شاڭحاي جانە گونكونگتاعى رەفەرەندۋم ۋچاسكەلەرى جەرگىلىكتى ۋاقىت بويىنشا 7.00-دە اشىلادى، ال داۋىس بەرۋ 20.00-دە اياقتالادى.

بۇعان دەيىن ءبىز لوندون مەن بىشكەكتەگى سايلاۋ ۋچاسكەلەرى قازاقستانداعى ا ە س بويىنشا رەفەرەندۋمعا قالاي دايىندالىپ جاتقانى تۋرالى جازعان بولاتىنبىز.

اۆتور

ەركەجان سماعۇلوۆا